Тергеу мәліметтері бойынша, мекеменің директоры мен бас бухгалтері еншілес компаниямен келісім-шартқа отырған.
Қаржылық мониторинг агенттігі астаналық балалар үйінің бірінен жетім балаларға тамақтануға бөлінген бюджет қаражатын жымқыру фактісі бойынша сотқа дейінгі тергеуді бастады, деп хабарлайды агенттік сайтында.
Тергеу мекеменің директоры мен бас бухгалтері сатып алу ережелерінде көзделген рәсімдерді орындамай, тәуелді бақыланатын кәсіпорынмен азық-түлік өнімдерін жеткізуге келісімшарт жасасқанын анықтады. Аталмыш компанияның нақты иесі бас бухгалтердің бұрынғы жұбайы болған.
2019-2020 жылдарға жасалған келісімшарттарға сәйкес, шенеуніктер жетімдерге азық-түлік сатып алуға бөлінген 130 миллион теңге бюджет қаражатынан 25,9 миллион теңгені жымқырған.
Тергеу жалғасуда.
