ҚР Еңбек және халықты әлеуметтік қорғау министрлігі «Алтын алқа» және «Күміс алқа» алқаларымен марапатталған көп балалы аналарға мемлекеттік жәрдемақыны тағайындау бойынша проактивті форматта қызмет алу тәртібін жеңілдетті.
«Кем дегенде бір баланы өз елінің лайықты азаматы етіп тәрбиелеу – әрбір ата-ананың алдында тұрған күрделі міндет. Көп балалы аналардың еңбегін атап өту және лайықты бағалау үшін мемлекет оларды иелері тиісті мемлекеттік жәрдемақы алатын «Алтын алқа» және «Күміс алқа» алқаларымен марапаттайды. Көп балалы аналардың уақытын үнемдеу мақсатында Еңбек министрлігі 2019 жылдан бастап осы жәрдемақыны тағайындау бойынша мемлекеттік қызметті проактивті форматта алуға мүмкіндік береді. Бұл әйелдерді кезекте тұру қажеттігінен құтқарды, олар мемлекеттік қызметті кез келген ыңғайлы уақытта және кез келген жерде ала алады. Бір ғана SMS-хабарламаға жауап бере отырып, көрсетілетін қызметті алушы жәрдемақыны проактивті ресімдеуге келісім береді және банк шотын растайды. Мемлекеттік қызмет көрсету үшін қажетті басқа да мәліметтер мемлекеттік органдардың ақпараттық жүйелерінен келіп түседі», – деді ҚР Еңбек және халықты әлеуметтік қорғау вице-министрі Ербол Оспанов.
Ведомствода нақтылағандай, бұрын қызмет алушылар екі SMS жіберген. Бір сұраққа жауап бере отырып, азаматтар жәрдемақыны проактивті ресімдеуге келісім берді. Екіншіден, олар банктік шотты растады. Енді бір хабарламаға жауап беру жеткілікті.
Жеңілдетілген тәртіп мемлекеттік жәрдемақыны проактивті форматта тағайындауды айтарлықтай арттыруға мүмкіндік берді. Осы өзгерістердің арқасында 2021 жылы проактивті қызмет алған көп балалы аналардың саны екі еседен астам – 9 мың адамға дейін өсті.
Естеріңізге сала кетейік, 2021 жылдың қыркүйегінде Қазақстанда заңнамаға түзетулер қабылданды, оған сәйкес «Алтын алқа», «Күміс алқа» алқаларымен марапатталған немесе бұрын «Батыр Ана» атағын алған, I және II дәрежелі «Ана даңқы» ордендерімен марапатталған әйелдер көп балалы анаға жәрдемақы алуға құқылы.
