Қарағанды облысының Нұра ауданында инватакси пайда болды. Оның қызметін жеке көмекшісі бар 1-ші топтағы мүгедектігі бар адамдар, сондай-ақ арбамен жүретін мүмкіндігі шектеулі балалар пайдалана алады.
«Инватакси қызметін алу үшін Нұра ауданының жұмыспен қамту және әлеуметтік бағдарламалар бөліміне жүгіну қажет. Тұрғындар еркін нысанда өтініш жазып, жеке куәлік пен дәрігерлік кеңес комиссиясының қорытындысын қоса беруі тиіс. Осыдан кейін олар инватакси қызметтерін тегін ала алады. Инватаксиге одан әрі тапсырыс беру үшін оларға біздің бөлімде құрылған диспетчерлік қызметке (8-72144) 2-16-79 нөмірі бойынша қоңырау шалу қажет», – деп хабарлады ауданның жұмыспен қамту және әлеуметтік бағдарламалар бөлімінде.
Автокөлік «Нұра ауданының мүгедектігі бар жандарды қолдау қоры» ҚҚ теңгеріміне қойылған. Ол оны ұстауға кететін шығындарды көтереді.
«Біз инватакси қызметтерімен биыл 75 адамды қамтуды жоспарлап отырмыз. Мүмкін сұраныс көбейетін шығар. Біздің ауданда мүгедектігі бар 1046 адам тұрады», – деп қосты аудандық жұмыспен қамту және әлеуметтік бағдарламалар бөлімінде.
