Премьер-Министр «Жайлы мектеп» ұлттық жобасын жүзеге асыру бойынша тапсырма берді.
Қазақстан Республикасының Премьер-Министрі Әлихан Смайылов «Жайлы мектеп» ұлттық жобасын жүзеге асыру бойынша тапсырма беріп, оқу үдерісін цифрландыруды жеделдету қажеттігін айтты.
«Оқулықтарды цифрландырып, балаларды ауыр рюкзактардан босатуымыз керек. Сондай-ақ, облыс әкімдіктері оқушыларды планшеттермен қамтамасыз ету мәселесін шешуі керек, атап айтқанда, «Қазақстан халқына» қорымен бірлесіп, оларды ауыл мектептерінің балалары үшін алу мүмкіндігін пысықтауы қажет», — деді Әлихан Смайылов.
Премьер-Министр Цифрлық даму, инновациялар және аэроғарыш министрлігіне байланыс операторларымен бірлесіп, еліміздің барлық мектептерін жоғары сапалы жоғары жылдамдықты интернетпен қамтамасыз етуді тапсырды.
«Жайлы мектеп» жобасы аясында 800 мың оқушыға арналған жаңа форматтағы мектептер салу жоспарлануда, деп еске салды ол.
«Ұлттық жобаны жүзеге асыруға жедел кірісуіміз керек. Өңірлердегі 143 мектептің учаскелеріндегі мәселелер әлі шешілген жоқ. Бұл жұмысты барынша жеделдету керек: қазан айының соңына дейін құрылысы 2023 жылға, ал жыл соңына дейін 2024 жылға жоспарланған мектептердің мәселесі шешілуі керек, – деді Әлихан Смайылов.
