Мектеп мемлекеттік емхананың қарамағына берілді.
Ақтөбеде мектеп оқушыларының екпе дауына қатысы бар медбике мен дәрігер жұмыстан шықты, деп хабарлайды КТК.
Қыркүйек айында мектепте бірінші сыныпқа баратын 42 оқушыға манту сынамасының орнына тірі БЦЖ вакцинасы берілді. Оқиға орын алған мектепке мемлекеттік тапсырысты жеңіп алған жеке клиника қызмет еткен. Қателік жасаған медбике мен балаларға екпе жасауға рұқсат берген дәрігер жұмыстан шеттетілді, енді олардың жұмыстан босатылғаны белгілі болды. Қазір мектепке мемлекеттік емхана қызмет көрсетеді.
«Бүгінгі күні балалар бақылауда. Медициналық орталыққа бекітілген барлық мектептер, төрт мектеп облыстық денсаулық сақтау басқармасының бұйрығымен Қарғалы ауруханасына берілді», — деді Ақтөбе қалалық денсаулық сақтау басқармасы басшысының орынбасары Бақытжан Түлкібаева.
Қызметкерлерді жұмыстан шығуы оқиғаның тергеу барысына әсер етпейтіні атап өтілді.