Әлеуметтік жағынан осал отбасылардан шыққан оқушыларға қазір мұндай оқу орындарында 15 пайыз орын берілген.
Білім министрі Асхат Аймағамбетов әлеуметтік жағынан осал отбасы балаларының мамандандырылған мектептерге түсуіне 15 пайыздық квота бөлу туралы бұйрыққа қол қойды, деп хабарлайды министрдің Facebook желісіндегі парақшасында.
«Жаңа квотаға сәйкес әлеуметтік жағынан осал отбасылардан шыққан 1500-ге дейін бала «БИЛ», «Дарын» және басқа да мектептерге түсе алады. Балалардың бір бөлігі қазірдің өзінде қабылданды. Біз жас таланттар үшін де, әлеуметтік-экономикалық факторларға байланысты өзін әлі көрсете алмағандар үшін де теңдестірілген жағдай жасауымыз керек»,-делінген Аймағамбетовтың жарияланымда.
Бұған дейін колледждер мен жоғары оқу орындарына түсуге осындай квоталар енгізілген болатын. 2022 жылы халықаралық пәндік олимпиадалардың 27 жеңімпазы 4,5 миллион теңгеге дейінгі сыйлықтарға ие болды.