Денсаулық сақтау министрлігі мектеп медицинасы жүйесі аясында балалардың профилактикалық тексерулерін толық цифрландыруға көшуді жоспарлап отыр.
«Денсаулық сақтау министрлігі мектеп медицинасындағы балаларды профилактикалық тексеруді толық цифрландыруды енгізуді жоспарлап отыр. Аппараттық кеңес барысында ведомство басшысы мектеп жасындағы балаларға жүргізілетін профилактикалық медициналық тексерулердің қазіргі моделі жеткілікті деңгейде тиімді емес әрі формалды сипатта екенін атап өтті. Қазіргі жүйеде диагностика сапасынан гөрі сандық көрсеткіштерге басымдық беріледі», — делінген жұма күні жарияланған хабарламада.
Қолданыстағы мәселелерді шешу үшін профилактикалық тексерулердің қазіргі моделін өзгерту, нәтижелерді өңдеуге цифрлық технологияларды енгізу, сондай-ақ функциялардың бір бөлігін орта буын медицина мамандарына беру көзделген кешенді шаралар ұсынылды.
«Тар бейінді мамандар тапшылығы мен медицина қызметкерлеріне түсетін жүктеменің жоғары болуы бір баланы тексеруге бөлінетін уақыттың қысқаруына, үстірт диагностикаға және денсаулықтағы бұзушылықтардың төмен деңгейде анықталуына әкеліп отыр. Сонымен қатар ерекше білім беру қажеттіліктері бар балалар мен мүгедектігі бар балаларды есепке алу мәселесі де өзекті болып қала береді», — деді өз баяндамасында Ана мен бала денсаулығын қорғау департаментінің директоры Магрипа Ембергенова.
Балалардың профилактикалық медициналық тексеру жүйесін жақсарту үшін білім беру ұйымдарын цифрлық электрокардиографтармен, пульсоксиметрлермен, бой мен салмақ өлшейтін құрылғылармен, отоскоптармен және деректерді автоматты түрде жіберетін телемедициналық кешендермен жабдықтау жоспарланып отыр.
«Алдағы уақытта интраоральды камералармен, плантографтармен және авторефрактометрлермен қосымша жабдықтау жоспарлануда. Министр балалардың профилактикалық медициналық тексерулерін толық цифрландыруды және барлық деректерді Денсаулық сақтау министрлігінің ақпараттық жүйелеріне біріктіріп, баланың электрондық денсаулық паспортын қалыптастыруды тапсырды», — деп толықтырды министрлікте.
Денсаулық сақтау министрі Ақмарал Әлназарова 2026 жылғы 1 қыркүйектен бастап елдегі барлық мектептерде профилактикалық тексерулер мен мектеп медицинасының жаңартылған форматын кезең-кезеңімен енгізуді тапсырды.
