Елордалық емханаларда «Сүндет-2021» акциясы аясында әлеуметтік аз қамтылған, көпбалалы отбасылардың мүгедектігі бар балаларын сүндетке отырғызу рәсімі тегін жасалды, деп хабарлады қала әкімдігінің ресми сайтында.
Сондай-ақ созылмалы ауруға шалдыққан және толық емес отбасылардың ұл балалары ерекше назарға алынды. Сүндеттеуді уролог және өз ісінің шебері, Нұр-Сұлтан қаласының Қоғамдық денсаулық сақтау басқармасының басшысы Тимур Мұратов және №2 көп салалы қалалық балалар ауруханасының жоғары білікті мамандары жасады.
Тимур Мұратов балалардың жағдайын тексеріп, біраз әңгімелесті.
«Бұл біздің екінші ұлымыз, 3 жаста. 10 күн бұрын баламызға дәстүр туралы көп айта бастадық, моральды тұрғыдан барынша дайындағанбыз, осы күннен кейін нағыз жігіт болады деп сендірдік. Ұйымдастырушылар мен емхана басшылығына алғыс білдіреміз. Жоғары деңгейде ұйымдастырылған іс-шара, барлығы қарастырылған», — деді сүндетке отыратын баланың анасы Ляззат Айтуғанова.
Жыл сайын өтетін акцияның мақсаты — көпбалалы және толық емес отбасылардан шыққан мүгедектігі бар және созылмалы аурулары бар балаларға әлеуметтік көмек көрсету. Акция аясында бұл медициналық қызмет жыл сайын ақысыз түрде жүзеге асырылады. Сүндеттеуді қалалық №9 емханада хирургтар мен урологтар өткізді. Бұл жерде 2-5 ота жасау кабинеттері ұйымдастырылған.
