Ол Достық даңғылында, «Абай» метро станциясының жанында орналасқан.
Алматыда әлеуметтік қызмет көрсету үйі ашылды, деп хабарлады қала әкімінің баспасөз қызметі.
«Ғимаратты қайта құру өткен жылы басталды. Қысқа мерзім ішінде мұнда барлық әлеуметтік қызметтерді алушылар үшін қолайлы жағдайлар жасалған. Қызметтердің жалпы саны-776», — делінген хабарламада.
Ашылу салтанатына Алматы әкімі Бақытжан Сағынтаев қатысты. Ол мемлекеттік органдар мен қаржы институттарының бірігуі әлеуметтік қызмет көрсету сапасын арттыратынын атап өтті.
«Әлеуметтік даму және қала тұрғындарын қолдау — Алматы әкімдігінің «Алматы-2050″ Даму Стратегиясында белгіленген басым және стратегиялық міндеті. Біз Алматыны тең мүмкіндіктер қаласы – инклюзивті адам орталығы бар қалаға айналдыру мақсатын қойып отырмыз», – деп атап өтті әкім.
Тірек-қимыл аппараты бұзылған адамдар үшін ғимаратта заманауи көтергіш орнатылды.
Бірінші қабатта келушілерді Алматы қаласының әлеуметтік қамтамасыз ету басқармасы, тұрғын үй саясаты басқармасы, Алматы қаласының халықты жұмыспен қамту орталығы, халыққа қызмет көрсету орталығы, мемлекеттік зейнетақы төлеу орталығы, Алматы қалалық полиция департаментінің көші-қон қызметі басқармасы, Еңбек, әлеуметтік қорғау және көші-қон комитетінің Алматы қаласы бойынша департаменті қабылдайтын болады.
«Екінші қабатта-Алматы жұмыспен қамту орталығының операциялық залы мен бэк – кеңсесі орналасқан, онда жұмыс іздеушілер лайықты жұмыс таба алады, ал жұмыс берушілер-қажетті қызметкерлерді табалы. Сондай – ақ, мамандық таңдау кезінде кәсіптік бағдар беру, кәсіптік даярлау, қайта даярлау, жұмыссыз азаматтардың біліктілігін арттыру, «Бастау бизнес» бағдарламасы бойынша оқуға жолдама және өтеусіз гранттар алу бойынша кеңестік қызметтер көрсетілетін болады»,-деп хабарлады баспасөз қызметі.
Үшінші және төртінші қабаттарда Алматы қаласының әлеуметтік әл-ауқат басқармасы, Алматы тұрғын үй саясаты басқармасының тұрғын үйді бөлу бөлімі және «Адалдық алаңы» халыққа қызмет көрсету аймағы жұмыс істейтін болады. Бесінші қабатта — Алматы қаласының тұрғын үй саясаты басқармасының бөлімдері және іс-шараларды өткізуге арналған көпфункционалды акт залы орналасқан.
«Әлеуметтік қызмет көрсету үйіне түрлі өмірлік жағдайларға, соның ішінде қақтығыстарға тап болған көптеген қала тұрғындары келетінін ескере отырып, орталықта заңгер мен психологтың кабинеттері қарастырылған. Балалармен келген қонақтарға ыңғайлы болу үшін балалар алаңы жабдықталған», – делінген хабарламада.
Әлеуметтік қызмет көрсету үйі Достық даңғылында, Абай метро станциясының жанында орналасқан, сонымен қатар жеті автобус және үш троллейбус маршруттары бар, бұл тұрғындарға қаланың кез келген нүктесінен оңай жетуге мүмкіндік береді.
