WhatsApp мессенджерінде бір есептік жазбаны бірнеше құрылғыда бір уақытта қолдану функциясы іске қосылды, — деп хабарлайды WABetainfo порталы.
Пайдаланушының құрылғылары өзара байланыстырылғаннан кейін, WhatsApp Web және WhatsApp Desktop бір уақытта жұмыс істеуі үшін басты құрылғының желіде болуы қажет емес. Бұл тәртіпте бір есептік жазбаға тіркелген бес гаджетті пайдалануға болады.
Бір уақытта бірнеше құрылғыны қолдану кезінде байланыс WhatsApp алгоритмдерін қолдану арқылы шифрланатын болады.
Әзірге қызмет қосымшаның 2.21.14.1 нөмірлі бета-нұсқасында және тек Android жүйесінде жұмыс істейді. Кейінірек бұл мүмкіндік жалпыға қол жетімді болады.
Бұған дейін мессенджерді жасаушылар да аккаунтты қалпына келтірген жағдайда пайдаланушыға растау коды бар SMS хабарлама жіберудің орнына қысқа қоңырауды қолдану мүмкіндігін тексере бастағаны хабарланған болатын.
