Ақмола облысында «Қауіпсіз аула» акциясы басталды. Халықпен алғашқы кездесу Көкшетауда өтті.
Облыстық Төтенше жағдайлар департаменті баспасөз қызметінің хабарлауынша, «Жеңіс» тұрғын үй кешенінің аумағында «Қауіпсіз аула» акциясы өткізілді. Акция шеңберінде тұрғындарға, сондай-ақ тұрғын үй кешенінің тұрғындарына күнделікті өмірде өрт қауіпсіздігі, судағы қауіпсіздік ережелері және балалардың көп қабатты тұрғын үйлердің терезелерінен құлап кетуіне жол бермеу шаралары түсіндірілді. Сондай-ақ балалармен түрлі төтенше жағдайлар бойынша викториналар өткізілді.
«Іс-шара барысында тұрғындарға өртке қарсы құрал-жабдықтар, өрт-техникалық жабдықтар, сүңгуірлер мен құтқару құралдары және Аксель есімді бельгиялық овчаркамен кинологтардың жұмысы көрсетілді. Акция ересектердің де, балалардың да жас кезінен бастап әртүрлі төтенше жағдайлар кезінде өзін-өзі ұстау дағдыларын қалыптастыру мақсатында жүзеге асырылады», — деді Дулат Қайыртаев, Ақмола облысы Төтенше жағдайлар департаментінің аға инженері.
«Бүгін құтқарушылар мен өрт сөндірушілер өздерінің жұмыстары туралы әңгімелеп, жабдықтарын көрсетті. Бұл өте қызықты және мазмұнды болды. Менің ойымша бұл балаларға қауіпсіздік шараларын сақтауға көмектеседі», — деді «Жеңіс» тұрғын үй кешенінің тұрғыны Алмас Ыдырысов.
Акция облыстың барлық аймақтарында жалғасады.
