Жыл соңына дейін Қазақстанда «әлеуметтік әмиян» жобасының пилоттық нұсқасын іске қосу жоспарлануда. Бұл үшінші тұлғалар тарапынан өндіріп алудан қорғалған ЖСН бойынша ашылған шот болады.
ҚР сауда және интеграция министрлігі баспасөз орталығының ақпараты бойынша, «әлеуметтік әмиян» жобасы халықтың әлеуметтік осал топтарының қаржы құралдарына қол жеткізуін қамтамасыз ету, әлеуметтік көмекті есептеу рәсімдерін жеңілдету, әлеуметтік қолдау құралдарын жетілдіру, сондай-ақ бюджет қаражатының шығыстарын оңтайландыру мақсатында құрылған.
Сауда және интеграция вице-министрі Әсел Жанасова хабарлағандай, жобаның пилоттық нұсқасын 2021 жылдың желтоқсан айының соңына дейін іске қосу жоспарланып отыр.
Әлеуметтік әмиянды енгізу шеңберінде «мемлекеттік бюджет қаражаты және (немесе) электрондық ақша түрінде аударылатын Мемлекеттік әлеуметтік сақтандыру қорының қаражаты есебінен жәрдемақылар мен әлеуметтік төлемдерді есептеу, есепке алу және пайдалану, сондай-ақ атаулы әлеуметтік көмекті пайдалану мониторингі қағидалары мен ерекшеліктерін бекіту туралы» Нормативтік-құқықтық актінің (НҚА) жобасы әзірленді.
Қазіргі уақытта НҚА жобасы ҚР премьер-Министрі Кеңсесінің қарауында жатыр. Осы құжаттың негізінде біз әлеуметтік әмиянға қатысты кейбір мәліметтерді білдік.
Әлеуметтік әмиян не үшін қажет
Нормативтік-құқықтық акт жобасындағы ақпаратқа сәйкес, әлеуметтік әмиян жәрдемақыларды, әлеуметтік төлемдерді және атаулы әлеуметтік көмекті (АӘК) аудару үшін ашылатын болады.
Бұл жобаның басты ерекшелігі-әлеуметтік әмияндардағы электрондық ақшаға қатысты билік етуге, мәмілелер жасауға және басқа да операцияларға уақытша шектеу қойылмайды.
Сондай-ақ мұндай шоттардан борыштарды өндіріп алуға және оларға тыйым салуға жол берілмейді.
Бірақ бұл ретте әлеуметтік әмиянға қол сұғылмайтын шоттың иесіне арналған мемлекеттік бюджет және Мемлекеттік әлеуметтік сақтандыру қоры есебінен төлемдер ғана есептелуі мүмкін.
Яғни, оны өзіңіз толтыру, ақша аудару немесе басқа көздерден қаражат алу мүмкін болмайды.
Әлеуметтік әмиян қалай ашылады
Әлеуметтік әмияндар «Азаматтарға арналған үкімет» мемлекеттік корпорациясы ұсынған жеке сәйкестендіру нөмірлері (ЖСН), толық есімдері, туған күндері және ұялы телефон нөмірлері негізінде тек Қазақстан азаматтарына автоматты түрде ашылады.
Жәрдемақылар, әлеуметтік төлемдер және АӘК келесі жағдайларда жаңа қол сұғылмайтын шотқа аударуды жоспарлап отыр:
егер оларды жобалау кезінде әлеуметтік әмиян таңдалса;
егер алушы дұрыс емес немесе жарамсыз банктік шотты көрсетсе;
егер тағайындау немесе төлеу кезінде алушының шотты көрсетуі көзделмесе;
проактивті әлеуметтік төлемдерді, жәрдемақылар мен АӘК тағайындау кезінде әлеуметтік-еңбек саласындағы уәкілетті орган өтініш берушінің өтінішінсіз.
