Елордада кезекті ауыл шаруашылығы жәрмеңкесі осы демалыс күндері 2-3 қазанда өтеді. Бұл жолы Қарағанды облысының ауыл шаруашылығы тауарларын өндірушілері өз өнімдерін ұсынады, сондай-ақ Нұр-Сұлтан қаласы кәсіпкерлерінің тауарларын сатып алуға болады, деп хабарлайды қала әкімдігінің ресми сайты.
Жәрмеңке дәстүрлі түрде «Хан шатыр» СОО алаңында (Қонаев көшесі мен Тұран даңғылының қиылысы) өтеді. Қарағанды облысының 9 ауданы мен 4 қаласының 126 фермерлік шаруашылығы мен қайта өңдеу кәсіпорындары өз өнімдерін ұсынады. Барлығы 600 тоннадан астам өнімді сату жоспарлануда. Сөрелерде азық — түліктің 117 атауы ұсынылады, оның ішінде: барлық түрдегі ет — 150,1 тонна, балық — 4,3 тонна, жұмыртқа — 200 мың дана, сүт өнімдері — 20 тонна, картоп пен көкөністер — 495 тонна, шұжық, кондитерлік, нан-тоқаш өнімдері-11,4 тонна.
Жәрмеңке Нұр-Сұлтан қаласының тауарлар мен қызметтердің сапасы мен қауіпсіздігін бақылау департаменті ұсынған санитарлық нормаларды сақтай отырып өткізіледі.
Естеріңізге сала кетейік, елордада ағымдағы жылы әлеуметтік маңызы бар азық-түлік өнімдерінің бағасын тұрақтандыру мақсатында көкөністер мен жемістердің пісу мерзімін ескере отырып, 14 жәрмеңке өткізу жоспарланған. Ауыл шаруашылығы өңірлік жәрмеңкелерінің маусымы Нұр-Сұлтанда 31 қазанға дейін жалғасады. 21 тамыздан бастап елордадағы жәрмеңкелерде Түркістан, Батыс Қазақстан, Шығыс Қазақстан, Қызылорда, Алматы, Атырау, Жамбыл және Ақтөбе облыстарының ауылшаруашылық тауар өндірушілері өз өнімдерін ұсынды.
