Мәжіліс депутаттары палатаның жалпы отырысында заң жобасын мақұлдады, оның аясында 2022 жылы Ұлттық Қордан 2,4 трлн теңге алу жоспарланған.
Ұлттық экономика министрі Әсет Ерғалиев «Қазақстан Республикасының Ұлттық қорынан 2022 — 2024 жылдарға арналған кепілдендірілген трансферт туралы» заң жобасын таныстырды. «Ұлттық қордан республикалық бюджетке кепілдендірілген трансфертті 2022 жылы — 2,4 трлн теңге, 2023 жылы — 2,2 трлн теңге, 2024 жылы — 2 трлн теңге мөлшерінде анықтау ұсынылады. Кепілдендірілген трансфертті республикалық бюджеттен ынтымақты зейнетақылар мен мемлекеттік базалық зейнетақы төлемдерін төлеуге бағыттау ұсынылады», — деп хабарлады министр.
Мәжілістің бейінді комитетінің қорытындысында заң жобасы Қазақстан Республикасы Бюджет кодексінің 24-бабының 2-тармағына сәйкес әзірленгені айтылды.
