Мемлекет басшысы Қасым-Жомарт Тоқаев даму әлеуеті төмен моноқалалардағы мигранттар үшін жеңілдікті ипотекалық бағдарлама жасауды тапсырды.
Үкіметке өңірлерді дамытудың жалпыұлттық жобасы аясында даму әлеуеті төмен моноқалаларды дамушы аймақтардың қатарына қосуды қамтамасыз етуді тапсырды.
«Бұл мамандарды қажет ететін келешегі зор, өсіп келе жатқан қалаларға азаматтардың өз еркімен қоныс аударуын ынталандырады. Біз өндірістік моноқалалар тұрғындарының көпшілігінің біліктілігі мен сұранысқа ие жұмысшылар мен инженерлік мамандықтар бойынша тәжірибесі бар екенін жақсы білеміз», — деді Қасым-Жомарт Тоқаев Екібастұз қаласында өткен кездесуде.
Тоқаев мемлекеттік тұрғын үй саясаты аясында даму әлеуеті төмен моноқалалардағы мигранттарға жеке бөлім бөлу керектігін айтты.
«Отбасы банкінің құралында мұндай азаматтар үшін 10 пайыздық бастапқы жарнамен және 2-5 пайыздық сыйақы мөлшерлемесімен жеңілдетілген ипотекалық бағдарлама қарастырылуы керек. Үкімет әкімдіктермен бірлесіп, бұл бастаманы жан-жақты пысықтауы керек», — деп қосты Тоқаев.
Моноқалалардың экономикасын әртараптандыруда және ШОБ дамытуда ірі жобалар маңызды рөл атқарады. Үкімет 20 мың жұмыс орнын құрумен 2 триллион теңгені құрайтын 79 ірі жобаны жүзеге асыруда.
«Алайда үш моноқалада мұндай жобаларды жүзеге асыру тоқтатылды, Ақсай қаласында бұл жобалар толық игерілмейді, жаңадан жоспарланған 19 жобаның 14-і немесе 75 пайызға жуығы Павлодар және Қарағанды облыстарына тиесілі.
Жаңатаста байыту зауытын салу жобасы тоқтап тұр. Стратегиялық инвестормен келісімге қол қойылды, инвестиция көлемі шамамен 1 млрд долларды құрайды. Бірақ келісімді ратификациялау рәсімі кешеуілдеп жатыр.
Үкіметке көтерілген барлық мәселелерді тез арада тексеріп, есеп беруді тапсырамын. Сонымен қатар экономикалық шындықтарды есепке алмай, квазимемлекеттік сектор тарапынан жобаларды қосымша жүктеуге жол бермеу керек», — деді Тоқаев.
