Төмендетілген тарифтер 2022 жылдың бірінші жартыжылдығында күшіне енеді.
«Қазпошта» АҚ жеке тұлғалар үшін салмағы 2 келіге дейінгі сәлемдемелерді жеткізу құнының деңгейіне дейін тарифтерді төмендетті, деп хабарлады компания.
«Қазпошта басшылығы Қазақстан Республикасының Президенті Қасым-Жомарт Тоқаевтың тапсырмасына сәйкес ағымдағы жылға бекітілген тарифтерді төмендету туралы шешім қабылдады. Енді салмағы 0,5 келіге дейінгі сәлемдемені Қазақстан бойынша жерүсті көлік шығындарымен жөнелту 900 теңгенің орнына 857 теңге, салмағы 1 келіге дейін – 1000 теңгенің орнына 900 теңге, 2 келіге дейін – 1200 теңгенің орнына 1130 теңгені құрайды.
Төмендетілген тарифтер 2022 жылдың бірінші жартыжылдығында жарамды болады.
2021 жылдың соңында «Қазпошта» 2022 жылға арналған тарифтерді көтерді. Компания мұның себебін 3000-нан астам рентабельді емес ауылдық филиалдарды ұстау, газеттерді жеткізу, зейнетақы беру, шекаралардың жабылуы және пандемияға байланысты халықаралық әуе қатынасындағы жүйелі үзілістермен байланыстырды.
Компания тарифтердің көтерілуі пошташылардың жалақысын көтеруге ықпал етеді деп сендірді.
