Түркістанда учаскелік полиция инспекторы мүгедектігі бар ер адам мен бес жасар қызды өрттен құтқарды.
– Күнделікті аулаларды аралап, қоғамдық тәртіпті қамтамасыз ету қызметін атқарамын. Сөйтіп көпқабатты үйдің екінші қабатындағы пәтерден түтін шығып жатқанын байқадым. Бірден үйге кірдім. Жатын бөлме өртеніп, іші түтінге оранған болып шықты. Сосын мүмкіндігі шектеулі азамат пен кішкентай қызды көріп, оларды қауіпсіз жерге апарып, алғашқы медициналық көмек көрсеттім. Ең бастысы, адамдардың өмірін сақтап қалу үшін жедел әрекет ету болды», — дейді №4 полиция участігінің инспекторы Олжас Ерсұлтанов.
Облыс орталығының тұрғындары полиция қызметкерінің ерлігін жоғары бағалап, шын жүректен ризашылықтарын білдіруде.
— Полиция капитаны Олжас Ерсұлтанов мүгедектігі бар ер адам мен 5 жасар қызды аман алып қалды. Ол өрт сөндірушілер келгенше тұрғын үйдегі өртті жалғыз өзі сөндірді. Біз, сол үйдің тұрғындары, оның ерлігіне куә болдық. Осы орайда оған алғысымызды білдіргіміз келеді, – делінген алғысын білдірген тұрғындардың хатында.
