Алматы облысында із-түссіз жоғалған үш бала Бесқайнар ауылдық округінің таулы аймағындағы Бесағаш ауылынан 12 шақырым жерде Табаған тау-шаңғы базасы бағытында табылды, деп хабарлайды ҚазАқпарат тілшісі.
Полиция департаментінің мәліметінше, 25 қазан күні сағат 23:45-те жергілікті тұрғыннан балаларды табуға көмек сұраған хабарлама келіп түскен. Оның айтуынша, сол күні сағат 10:30 шамасында алты жасар баласы 11 жастағы бөлесі мен 13 жастағы бөлесі үйден шығып кетіп, оралмаған.
Облыстың жеке құрамы дереу кәмелетке толмағандарды іздеуге бағытталып, барлық біріктірілген күштер мен полиция бөлімшелеріне бағдарлар жіберілді. Іздеу шараларына еріктілер де қосылды.
«Нәтижесінде күндізгі кезекшілік кезінде балаларды Бесағаш ауылынан 12 шақырым жерде Бесқайнар ауылдық округінің таулы аймағындағы «Табаған» серіктестіктер тобы бағытында жергілікті тұрғын тауып алған. Қазіргі уақытта іздеуде жүрген азаматтар үйіне аман-есен оралды. Балалардың ата-аналары полиция қызметкерлеріне және іздестіру жұмыстарына көмектескендердің барлығына алғыстарын білдірді», — деп хабарлады Алматы облысы әкімдігінің баспасөз қызметі.
