ҚР Еңбек және халықты әлеуметтік қорғау вице-министрі Назгүл Сағындықова 29 наурызда РСК брифингінде зейнетақы жүйесінде қандай өзгерістер болатынын айтты.
Жаңа Әлеуметтік кодекстің жобасы мемлекет басшысының қарауына ұсынылып, 1 шілдеден бастап күшіне енеді.
Қазіргі жүйе зейнеткерлердің үш ұрпағын қамтитын болады. Құжатта базалық зейнетақының мөлшерін арттыру қарастырылған. 2024 жылдың 1 қаңтарынан бастап болашақ зейнеткерлер үшін жұмыс берушілерден қосымша зейнетақы жарналары енгізіледі.
«1998 жылға дейін және 1998 жылдан кейін зейнетке шыққан зейнеткерлер зейнетақы төлемдерінің негізгі бөлігін мемлекеттен, ал болашақ зейнеткерлер – жинақтаушы зейнетақы жүйесінен алатын болады», — деп түсіндірді ҚР Еңбек және халықты әлеуметтік қорғау вице-министрі Назгүл Сағындықова.
Сонымен қатар, кодекс нормалары салымшыларға өз активтерін басқаруға мүмкіндік береді.
Азаматтар емделуге және тұрғын үй сатып алуға белгіленген жеткіліктілік шегін жұмсай алады. Салымшылар алынғаннан кейін қалған зейнетақы жинақтарының немесе барлық жинақталған соманың 50%-дан аспайтын бөлігін жеке басқаруға бере алады.
«Бұл ретте, зейнетақы жинақтарының сақталуына мемлекеттік кепілдік тек Ұлттық банк басқаратын жинақтардың бөлігіне ғана қолданылатынын атап өткен жөн», — деп қосты спикер.
Сонымен бірге ол инвесторлар басқарушы компанияларды таңдаған кезде ықтимал тәуекелдерді өздері бағалауы керек деп қосты.
Қазақстандықтардың зейнетақы жинақтары бір жылда 11,4%-ға өсті. 1 наурыздағы жағдай бойынша Бірыңғай жинақтаушы зейнетақы қоры салымшыларының (алушылардың) жеке шоттарында 15,13 трлн теңге көлемінде зейнетақы жинақтары болды.
