Есту қабілеті нашар ондаған адамдар «Қазмырыш» «көзіне» айналады. Шығыс Қазақстан облысындағы ең ірі компания нысандарын қорғау аясында Бейнебақылау орталығын іске қосты. Мұнда қауіпсіздікті онлайн қадағалайтын арнайы адамдар ғана жұмыс істейді.
6 сәуірде Өскеменде Бейнебақылау орталығының ашылуы өтті. Алпыс қызметкердің барлығы дерлік есту қабілеті нашар адамдардан құралған. Облыс орталығындағы кеңседен жаңа бөлімшенің қызметкерлері Риддер тау-кен байыту кешенінің байыту фабрикасының учаскесін қашықтықтан бақылаумен айналысады, мониторлар мен камералар арқылы қауіпсіздікті бақылайды. Ал егер олар ауытқуларды байқаса, дереу жауапты әріптесіне хабарлайды.
«Инклюзивті тәжірибені енгізу – металлургтердің қоғамның дамуына қосқан маңызды үлесі», — деп түсіндіреді «Қазмырыш» бас директоры Александр Хмелев. — Ерекше қажеттіліктері бар адамдар ғана жұмыс істейтін жаңа кеңсе – біздің барлығына тең құқықтар мен мүмкіндіктерді қамтамасыз ету жолындағы қадамымыз. Мұндай тәжірибелер барлығына өздерін лайықты жұмыс пен табыспен қамтамасыз ете отырып, сонымен қатар жаңа тәжірибе мен дағдылар алумен бірге біздің өндірістік үдерісімізге қосылуға мүмкіндік береді»
«Қазмырыш» бұл жобаны Қазақстан есту қабілеті жоқ жандар қоғамымен бірлесіп жүзеге асырды. «Арман» мәдениет үйіндегі бөлме таңдалды. Металлургтер жөндеу жұмыстарын жүргізді, сонымен қатар жұмыс орындары мен қоршаған ортаны болашақ әріптестерінің ерекше қажеттіліктеріне бейімдеді. Сонымен қатар, Орталықтың әрбір қызметкері арнайы әзірленген бағдарлама бойынша қажетті оқудан өтті. Бір мезгілде 15 адам кезекшілік етеді: бөлімшенің кеңсесінде есту қабілеті бұзылған адамдар арасынан 11 оператор және есту қабілеті жақсы бір аға оператор жұмыс істейді. Сондай-ақ ерекше қажеттіліктері бар 3 қызметкер үйінде бейне мұрағатты көреді. Шалғайдағы жұмысшылардың екеуі Риддерде, біреуі Өскеменде тұрады. 15 ауысымға қатысушылардың әрқайсысына арнайы жұмыс орны жабдықталған.
Сонымен қатар, Бейнебақылау орталығы қажетті тұрмыстық техникамен, ыдыс-аяқпен және жиһаздармен жабдықталған демалыс бөлмесін ұсынады.
«Қазмырыш» қашанда бизнестің әлеуметтік жауапкершілігіне ерекше көзқарас танытып келеді, – деді Өскемен қаласының әкімі Жақсылық Омар. – Ерекше қажеттіліктері бар бірнеше ондаған адамды жұмыспен қамту – бұл нағыз қамқорлық және интеграцияға тамаша мүмкіндік. Бұл жайлы ортаны, ерекше адамдардың қажеттіліктеріне бейімделген кеңсені құру ғана емес, сонымен қатар әрбір адамға пайдалы және маңызды жұмыстарды орындау мүмкіндігі».
Бір қызығы, Бейнебақылау орталығының қызметкерлері оқудан кейін өз мамандығын жетілдіруге мүмкіндік алады: ұжымға тұрақты негізде куратор бекітіледі. Ал тәжірибелік дағдыларды жақсы меңгеру үшін компанияның тәжірибелі мамандары арнайы тренингтер өткізеді.
