Премьер-Министрдің орынбасары – Еңбек және халықты әлеуметтік қорғау министрінің 2023 жылғы 8 маусымдағы бұйрығымен «Халықты әлеуметтік қорғау саласындағы әлеуметтік қызметкерлерді аттестаттау қағидалары» бекітілді.
Аттестаттау – нәтижелері бойынша біліктілік санаттары берілетін әлеуметтік қызметкердің біліктілік деңгейін анықтау үшін жүргізілетін рәсім.
Әлеуметтік қызметкерлер үш жылда бір реттен кем емес, бірақ осы лауазымды атқарған күннен бастап бір жылдан ерте емес аттестациядан өтеді. Бұл ретте бала күтіміне байланысты демалыста жүрген әлеуметтік қызметкер жұмысқа кіріскеннен кейін 6 айдан ерте емес аттестациядан өтеді.
Әлеуметтік қызметкерлердің біліктілік санаттары үш жыл мерзімге тағайындалады.
Аттестаттау мыналарды қамтиды:
тестілеу;
сұхбаттан өту;
аттестаттау комиссиясының хаттамалық шешімін шығару.
Аттестаттауды өткізу үшін уәкілетті органдар кемінде бес адамнан және хатшыдан тұратын аттестаттау комиссиясын құрады. Төрағаны аттестаттау комиссиясының мүшелері олардың арасынан сайлайды.
Аттестаттаудан қазақ немесе орыс тілдерінде өтуге болады.
Біліктілік санатын беру (растау) үшін әлеуметтік қызметкер уәкілетті органға мынадай құжаттарды ұсынады:
кез келген нысандағы жазбаша өтініш;
кадрларды есепке алу бойынша жеке парағы;
ұйымның кадр қызметі куәландырған білімі туралы дипломның көшірмесі;
ұйымның кадр қызметі куәландырған еңбек кітапшасының көшірмесі;
біліктілік санатын беру туралы куәліктің көшірмесі (бар болса).
Аттестаттауды, анықтаманы, арнайы және басқа да әдебиеттерді қағаз, электрондық және басқа да тасығыштардағы электрондық құрылғыларды (оның ішінде ұялы телефондар мен басқа да электрондық жабдықты қоса алғанда) қабылдауға және жіберуге пайдалануға болмайды.
Сынақ кезеңіне арналған мұндай құрылғылар ұяшықтары бар арнайы шкафтарда сақталады.
Аталған талаптар бұзылған жағдайда аттестаттау комиссиясы әлеуметтік қызметкерді аттестациядан шеттете отырып, бұзушылық туралы акт жасайды.
Әлеуметтік қызметкер аттестаттау комиссиясының отырысына келмеген кезде ол дәлелді себептермен (уақытша еңбекке жарамсыздық, демалыста болу, кәмелетке толмаған баланың ауруы, жақын туысының қайтыс болуы, іссапарда болу) келмеген жағдайды қоспағанда, аттестатталмаған деп танылады.
Әлеуметтік қызметкер аттестаттау комиссиясының отырысына дәлелді себептермен келмеген жағдайда, оны аттестаттау туралы мәселені қарау ол жұмысқа кірген күннен бастап бір айдан кешіктірмей кейінге қалдырылады.
Тестілеу
Әлеуметтік қызметкерлерді тестілеу үлгілік біліктілік сипаттамаларында көзделген нормативтік құқықтық актілерді білуге арналған.
Тестілеу күнін әлеуметтік қызметкерге аттестаттау комиссиясының хатшысы тестілеу басталғанға дейін екі аптадан кешіктірмей жазбаша түрде хабарлайды.
Әлеуметтік қызметкер тестілеуде дұрыс жауаптардың 70 және одан да көп пайызын жинамаса, сұхбатқа жіберілмейді.
Тест нәтижелері тапсырылған күні жарияланады.
Сұхбат өткізу
Әлеуметтік қызметкермен сұхбат объективтілік, дұрыстық және ізгі ниет атмосферасында өтеді. Аттестаттау комиссиясының отырыстары аудио және (немесе) бейнежазбаға түсіріледі. Дыбыс және (немесе) бейнежазба аттестаттау рәсімін жүргізетін уәкілетті органда кемінде үш жыл сақталады.
Әлеуметтік қызметкерге қойылатын сұрақтар оның кәсіби-біліктілік дайындығы, іскерлік қасиеттері мәселелері бойынша құзыретінің деңгейін анықтауға бағытталған және атқаратын лауазымының деңгейіне сәйкес келуі керек.
Сұхбат нәтижелері бойынша аттестаттау комиссиясы келесі хаттамалық шешімдердің бірін қабылдайды:
біліктілік санатын беру туралы;
біліктілік санатын беруден бас тарту туралы.
Халықты әлеуметтiк қорғау саласында бiрiншi, екiншi немесе жоғары бiлiктiлiк санаты әлеуметтiк қорғау және жұмыспен қамту ұйымдары басшылары, мамандары және басқа да қызметкерлерi лауазымдарының үлгiлiк бiлiктiлiк сипаттамаларына сәйкес берiледi.
Біліктілік санатын беруден бас тартылған жағдайда, қайта аттестаттау қағидаларда белгіленген тәртіппен, бірақ біліктілік санатын беруден бас тарту туралы шешім қабылданған күннен бастап үш айдан ерте емес өткізіледі.
Біліктілік санатын беру туралы куәлікті беру және қайтарып алу мерзімдері
Аттестаттау комиссиясы біліктілік санатын беру туралы шешім қабылдаған күннен кейін үш жұмыс күні ішінде комиссияның хатшысы:
әлеуметтік қызметкерге тиісті журналда белгіленетін біліктілік санатын беру туралы куәлік береді;
әлеуметтік қызметкерлерге біліктілік санатын беру туралы ақпаратты уәкілетті мемлекеттік органға жібереді.
Аттестаттау нәтижелеріне шағымдану тәртібі
Әлеуметтік қызметкер аттестаттау нәтижелерімен келіспеген жағдайда, ол аттестаттау комиссиясының әрекетіне уәкілетті органға шағымдануға құқылы. Шағым тіркелген күннен бастап 5 жұмыс күні ішінде қаралады.
Аттестаттау комиссиясының шешімімен келіспеген жағдайда Әкімшілік іс жүргізу кодексінің 91-бабы 5-тармағына сәйкес сотқа дейінгі тәртіпте шағымданғаннан кейін ғана сотқа жүгінуге болады.
Бұйрық 2023 жылдың 1 шілдесінен бастап күшіне енеді.
