Солтүстік Қазақстан облысындағы Вишневка ауылының тұрғындары балаларын күнде мектепке тасымалдай алмайды.
Вишневка ауылының тұрғындары күн сайын оқушыларды мектепке апарып-келуге мүмкіндік болмағандықтан балаларын интернатқа оқуға беруде: автобустар жүрмейді, таксилер қызмет көрсетуден бас тартады, жолдардағы үлкен ойықтардан жеке көліктер үнемі бұзылып қалады. Вишневка ауылы Петропавл қаласынан небәрі 15 шақырым жерде орналасқан. Сондықтан ауыл барынша жағдайы жасалған ауылдардың бірі болуы керек сияқты. Алайда небәрі 5 шақырымды құрайтын жолдың аянышты күйіне ауыл тұрғындары шыдас бермеуде. Бұл екі аралыққа втобустар жүрмейді, таксилер қатынаудан бас тартады немесе екі есе ақы алады екен.
«Бұл біз үшін күрделі тақырып. Барлық тұрғындардың көлігі жөнделіп жатыр. Әрине қала жап-жақын, бірақ жол жоқ. Дала жолымен жүру тіпті мүмкін емес «, — дейді жергілікті тұрғын Наталья Ахтырская.
Мектеп оқушылары көрші ауылдағы интернатта тұрып оқуға мәжбүр, өйткені мұндай жолдармен күн сайын балаларды мектепке апару мүмкін емес. Оның үстіне маусымаралық уақытта батпақ жол шынымен қауіпті болады, дейді жергілікті тұрғындар.
«Бізге автобус керек, тым болмаса кішкентай Газель керек. Біздің мектеп оқушыларымыз интернатта тұрады. Немерем демікпемен ауырады, енді оны қадағалап, дер кезінде дәрі-дәрмек беруіміз керек», — деп шағымданды Вишневка тұрғыны Зинаида Рунг.
Аудан әкімдігінде бұл жол төрт жыл бұрын жартылай жөндеуден өткендіктен әлі жолды күрделі жөндеу жоспарланбады, сондықтан әлі де осы жол осы қалпында қызмет етуі керек дейді.
«Қазір жөндеу мәселесі күн тәртібінде жоқ, бірақ алдағы уақытта қаржыландыру қарастырылып жатса жөндеу жұмыстарын жүргізуді жоспарлап отырмыз. Біз бұл жолды профильдеу жұмыстарын жүргіземіз — бұл жолдардағы ойықтарды жою үшін қиыршық тастарды толтыру және тегістеу», — дейді Қызылжар аудандық тұрғын үй-коммуналдық шаруашылық, автомобиль көлігі және автомобиль жолдары бөлімінің басшысы Теміржан Елжасов.
Ал бұл мәселе бір ғана ауылдық мәселе емес. Жалпы облыстағы жеті мың жергілікті жолдың төрттен бірі күрделі жөндеуді қажет етеді.
