Хоспистің қарт науқастары мен оңалту орталығының мүгедектігі бар балаларды азаптаған медицина факультетінің студенті, белгілі болғандай, Астана медицина университетінің 5 курс студенті. «ҚазАқпарат» ХАА-ның ресми сауалына университет тарапынан диплом берілмейтіні туралы жауап берілді.
«28 маусымда әлеуметтік желіде студенттің қатысуымен бейнеролик тарады. Бұл мәселені бірден университеттің тәртіптік кеңесінде қарау туралы шешім қабылданды. Бұл студент «Астана медицина университеті» КЕАҚ-ның 5 курс студенті еді», — деп түсіндірді «ҚазАқпарат» ХАА ресми сауалына қатысты.
Бірқатар БАҚ жазғандай Астана хосписінде медицина факультетінің студенті ақыл-есі кем егде жастағы адамдарды ұрып-соғып, нәжістерін жеуге мәжбүрлеген. Кейін мүгедектігі бар балаларды оңалту орталығында қинаған.
Астана медицина университеті мүгедектігі бар балаларға арналған оңалту орталығында жұмыс істеу «Астана медицина университеті» КЕАҚ тәжірибесіне жатпайды деп жауап берді. Бұл студенттің бос уақытында университеттің оқу үдерісіне қатысы жоқ жеке жұмысы.
«Университетіміздің тәртіптік кеңесінде студенттің сөзі тыңдалды. Оған диплом берілмейді. Университет шешім қабылдауда ашықтық пен негізділікті, академиялық адалдық, корпоративтік мәдениет және этика кодексін сақтауды қамтамасыз етеді», — делінген университеттің ресми мәлімдемесінде.
Бұған дейін Денсаулық сақтау министрі Ажар Ғиният медицина факультетінің студентінің хоспис тұрғындары мен Астанадағы оңалту орталығының мүгедектігі бар балаларды қорлауы туралы айтқан болатын.
Мүгедектігі бар балалар мен хоспис пациенттерін азаптағаны үшін медициналық студент 7 жылға дейін бас бостандығынан айырылуы мүмкін.
