Қонаевтағы балалар лагерінің бөлмесінің суретін журналист Сандуғаш Дүйсенова Instagram парақшасында жариялады. Кадрлардан балалар ұйықтап жатқан бөлменің қабырғаларының бояуы кеткенін, жалпы іші жайлы емес екені көрінеді.
Фотосуретте сондай-ақ балалар төсектерінің бір-біріне тым жақын орналасқаны көрсетілген, ал санитарлық дәрігерлердің нұсқауы бойынша жатын бөлмесіндегі орын саны бір балаға төрт шаршы метрден есептелуі тиіс.
Балалар құқығын қорғау комитеті жұмыс тобының лагерьге кеткенін хабарлады.
«Білім министрлігі мен Білім басқармасының өкілдері орталықта балалардың тұру, қауіпсіздігін қамтамасыз ету жағдайын тексереді. Бұған дейін Қонаев атындағы білім бөлімі осы жекеменшік «Бәйтерек» лагерінде мониторинг жүргізген. Оның барысында лагерьдің санитарлық-эпидемиологиялық бақылау рұқсаты бар екендігі анықталды», — деді комитет.
Оқиға орнында прокурорлар да жүр.
Еске салайық, бұл ата-аналардың сынына ұшыраған алғашқы лагерь емес. Шілде айының ортасында халықтың әлеуметтік осал топтары балаларының демалысын ұйымдастыруға қатысты жантүршігерлік оқиға қазақстандықтарды дүр сілкіндірді. Желіде балалар лагерінің саунада орналасқанын бейнелейтін бейнежазбалар пайда болды.
Алматы әкімдігі бұл жағдайға қатысты түсініктеме беріп, лагерь ұйымдастырушыларын жосықсыз қызмет көрсетуші деп танып, сотқа жүгінетінін айтып, бұған жауапты қызметкерге қатаң сөгіс жарияланды. Прокуратура екі бап бойынша: Қылмыстық кодекстің 361-бабы «Билікті асыра пайдалану» және Қылмыстық кодекстің 140-бабы «Кәмелетке толмаған баланы тәрбиелеу жөніндегі міндеттерді орындамау» бойынша сотқа дейінгі тергеуді бастады.
Жанжалдан кейін қалалық білім басқармасының қызметкерлері мен қоғамдық кеңес мүшелері балалар лагерлеріне рейд жүргізіп, балаларға арналған тағы бір күмәнді ұйымдастырылған демалыс орнын анықтады.
