Астанада екі автобус жүргізушілері арбадағы баласын көлікке жібермей қойғаны туралы қала тұрғыны арызданды.
Бұл туралы ол Facebook парақшасында жазды. Басылым авторының айтуынша, №12 қалалық бағыттың екі автобусы бірінің артынан бірі жүріп, жүргізушілердің ешқайсысы баласын қоғамдық көлікке отырғызбаған.
«Бірінші маған қолымен «артқы автобусқа отыр» дегенді көрсетті, ал артқы автобус болса біздің алдымызда есікті жауып, біздің отырмайтынымызды ыммен көрсетті! Мұндай қатыгездік қайдан шығады, жүргізушілерге автобусқа кімді отырғызу керектігін шешу құқығын кім берді? Баланың мүгедектігі бар болса, ол адам емес пе?». – деп шағымданды астаналық ана.
Оқиға бойынша әкімдіктің «109» бірыңғай байланыс қызметі әрекет етті.
«Сіздің өтінішіңіз Астана әкімдігінің iKomek бірыңғай байланыс орталығында SD10282441 нөмірімен тіркеліп, тиісті органға жолданды. Жауап жоғарыда аталған органнан ақпарат түскен кезде беріледі», — делінген хабарламада.
CTS компаниясының баспасөз қызметі жағдайды қарастырып кейінірек жауап беруге уәде берді.
