Бүгін 30 тамызда Қазақстанда мемлекеттік мереке — Конституция күні атап өтілуде.
Мереке 1995 жылы жалпыхалықтық референдумда Конституция қабылданған күні тойланады. Құжатқа сәйкес Қазақстан президенттік басқару нысанындағы мемлекет болып жарияланды.
Конституцияның бірінші бабында Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, оның ең қымбат қазынасы – адам және оның өмірі, құқықтары мен бостандықтары деп көрсетілген.
Республика қызметінің түбегейлі қағидаттары: қоғамдық келісім мен саяси тұрақтылық, бүкіл халықтың игілігі үшін экономикалық даму, қазақстандық патриотизм, мемлекет өмірінің аса маңызды мәселелерін демократиялық әдістермен шешу, оның ішінде республикалық референдумда немесе Парламентте дауыс беру арқылы шешу.
Конституция туралы әрбір Қазақстан азаматы нені білуі керек
Биыл 30 тамыз сәрсенбіге сәйкес келеді. Конституция күні осы ай мен жаздың соңғы демалыс күні болды. Бейсенбі 31 тамыз және жұма 1 қыркүйек жұмыс күндері болып табылады. Бұл айда тоғыз күн демалыс бар.
2022 жылғы 5 маусымда Қазақстанда Конституцияға өзгерістер мен толықтырулар енгізу бойынша республикалық референдум өтті. Дауыс беруге арналған бюллетеньде «Қазақстан Республикасының Конституциясына өзгерістер мен толықтырулар енгізу туралы» заң жобасында көрсетілген (референдумға барлығы 56 өзгерту енгізілді — Ескерту) Қазақстан Республикасының Конституциясына толықтырулар мен өзгерістерді сіз қабылдайсыз ба?» деген бір ғана сұрақ болды.
Референдумға сайлаушылардың 68,05 пайызы (7 985 769 адам) қатысты. Оның ішінде азаматтардың 77,18 пайызы (6 163 516 адам) Конституцияға өзгерістер енгізуді қолдап дауыс берді.
