Кейбір қазақстандықтар баспана кезегінде тезірек қозғала алады. Себебі, талаптарға сай келмейтін үміткерлер тізімнен шығарылады.
Индустрия және құрылыс министрлігінің мәліметінше, барлығы 233 мың адам кезектен шығарылады. Олардың кейбірінің жеке баспанасы бар болса, басқалары құжат тапсыру кезінде қате жіберген. Бүгінге дейін әкімдіктер 10 мың адамды кезектен шығарып үлгерді. Басқа қазақстандықтар қалаған пәтерді күтуді жалғастыруда, үміткерлердің кейбірі он жыл немесе одан да көп уақыт күтеді.
«Шамамен 233 мың адам талапқа сай емес және кезектен шығарылуы мүмкін. Бүгінгі таңда әкімдіктер жұмысқа кірісіп, 10 мыңға жуық адамды кезектен шығарып үлгерді. Біреу кезектен шығарылған кезде, сәйкесінше кейін тұрған адамдар кезегі алға жылжиды, яғни баспанаға тезірек қол жеткізеді», — дейді Индустрия және құрылыс министрлігі басқару комитетінің сарапшысы Самат Бекжігіт.
Министрліктің мәліметінше соңғы 10 жылда баспана кезегінде тұрғандар саны алты есеге артқан. Бүгінде тізімде 600 мыңнан астам адам бар. Билік «орынсыз» кезек мәселесін цифрландыру арқылы шешкісі келеді.
«Біз жергілікті атқарушы органдардан кезекте тұрғандардың барлығын «Отбасы банкіне» ауыстырғымыз келеді. Оны цифрландырамыз, сонда кезекте тұрған әрбір адамның жеке кабинеті болады және адам факторынсыз әр адам өзінің қандай кезекте тұрғанын көре алады. Біз жергілікті тұрғын үй комиссияларын алып тастаймыз, өйткені бөлу кезінде заң бұзушылықтар болды деп халық наразы болған жағдайлар болды», — деді Мәжіліс депутаты Лұқбек Тұмашинов.
Жыл сайын мемлекет мұқтаж жандарға жалдауға және несиеге 25 мыңға жуық пәтер береді.
Тамыз айында тиісті министрлік тұрғын үй кезегінен шығарылуы мүмкін азаматтардың арасында жеке баспанасы бар азаматтар бар екенін хабарлады; тіркелген жері кезекте тұрған аймаққа сәйкес келмейтіндер; тіркелмеген немесе Қазақстан азаматтығы жоқ адамдар, сондай-ақ қайтыс болған азаматтар да кезектен шығарылады.
