Астанада парахоккейден әлем чемпионаты аяқталды. Елімізде алғаш рет әлем чемпионатына 6 команда қатысты, деп хабарлайды елорда әкімдігінің ресми сайты.
Финляндия, Словакия, Швеция, Ұлыбритания, Жапония және Қазақстан командалары өнер көрсетті.
Қазақстан құрамасының кеңесшісі Николай Шаршуковтың айтуынша, ойын барысында қазақстандықтар В дивизионындағы орнын сақтап, әлемдік деңгейдегі жарысты сәтті аяқтады.
«Кез келген турнирде әр команда жеңіске ұмтылады.
Оның үстіне 2021 жылы ғана құрылған команда бір жылдың ішінде С дивизионында 2-орынға ие болды. Осы қарқынмен ойыншылар жоғарғы лигадан үмітті. Дегенмен жарыс барысы Қазақстанның лайықты деңгейін көрсетті. Алдағы 2024 жылға арналған жоспарларға В дивизионының тұрақты ойындары кіреді.
Әзірге біздің мақсатымыз – әлем чемпионатына тыңғылықты дайындалып, биылғыдан да жақсы нәтиже көрсету», – дейді Николай Шаршуков.
Чемпионаттың соңғы ойынында ел спортшылары британдық команданы 4:3 есебімен ұтып, турнирдің жалпы рейтингінде төртінші орынға тұрақтады.
Жарыс қорытындысы бойынша Жапония мен Словакия құрамалары парахоккейден А тобы бойынша әлем чемпионатына қатысуға жолдама алды.
Жарыстың ұйымдастырушылары – Қазақстан Республикасы Туризм және спорт министрлігі, SportQory, «Самұрық-Қазына» АҚ, «Қазақстан халқына» қоры, ҚР Ұлттық Паралимпиада комитеті және Астана қаласының Спорт басқармасы.
