Қарағандыдағы №1 облыстық перинаталдық орталықта өңірдегі алғашқы ретинальды портативті камера пайда болды.
Заманауи диагностикалық жабдық AYALA қайырымдылық қорының демеушілігімен сатып алынды және қазірдің өзінде шала туылған нәрестелерді көру қабілетінің жоғалуынан сақтауға көмектесуде.
Облыста жыл сайын 23 мыңнан астам бала дүниеге келсе, 1300-ден астам нәресте шала туылады. 40% жағдайда мұндай балаларға ретинопатия диагнозы қойылады, бұл жиі көру қабілетінің толық жоғалуына әкелетін ауыр ауру. Офтальмологтар ретинопатияға бірінші скринингті туғаннан кейін 21 күннен кейін жүргізеді. Егер ретинопатияның агрессивті түрі 24-72 сағат ішінде анықталса, балалар сетчатканың лазерлік коагуляциясынан өтеді.
Ретинопатияның қауіптілігі аурудың сыртқы белгілерінің болмауында. Оның ерте көріністерін арнайы жабдықты пайдалана отырып, тәжірибелі офтальмолог ғана анықтай алады. Бұрын бұл ауруға күдік болса, белгілі бір белгілер бойынша балаларды елордаға жіберуге тура келетін. Бұл өте қымбат және қауіпті, өйткені шала туылған нәрестені тасымалдауға құрсақішілік жағдай жасау керек», — дейді облыстың бас штаттан тыс неонатологы Гүлнар Ғалиева. – Соңғы бірнеше жылда біз ретинопатияны ерте диагностикалауда прогреске қол жеткіздік. Бізде скринингтерді сәтті жүргізетін офтальмолог бар. Бізге бір ғана жетіспейтіні – осындай жоғары технологиялық жабдықтар болды.
№1 перинаталдық орталықта қазір дәрігерлерге жаңа туған нәрестелердегі қауіпті көз ауруларын ерте диагностикалауға және дер кезінде емдеуге көмектесетін құрал-жабдықтардың толық жиынтығы бар. Сондай-ақ AYALA қоры ретинопатияның фульминантты түрлерін емдеу орталығына 10 бөтелке Lucentis препаратын сыйға тартты.
– Жаңа туылған нәрестелердегі ретинопатия мен басқа да көз патологияларын ерте скринингке түсіру үшін біздің орталыққа ретинальды камера қажет болды. Әсіресе лазерлік операцияларды жасағанда өте қажет болатын. Бұрын маңдай офтальмоскопымен тексеру жүргізетінбіз. Жаңа қондырғылардың көмегімен сәбилерінің ата-аналарына көздің сетчатка қабығын анық көрсете аламыз, суреттері монитор экранында көрсетіледі, түрлі-түсті, анық, көз торындағы өзгерістер анық көрінеді», — дейді №1 перинаталдық орталықтың офтальмолог дәрігері Гүлімай Баймұханова.
– Биылғы жылдың 9 айында шала туылған 407 нәрестені тексеріп, оның 106-сында ауру анықталса, бүгінге дейін 52 сәбиге ота жасалды.
Qazaq Oil жанармай құю станцияларының ұлттық желісі AYALA қайырымдылық қорына Қарағанды облысы үшін сетчатка камерасын алуға қаражат жинауға көмектесті. Оның жанармай құю станцияларының барлығында дерлік шала туылғандардың ретинопатиясы жобасына арналған қораптар мен QR белгілері орнатылды. Қорға Qazaq Oil клиенттерінен 5,7 миллион теңгеден астам қаржы түсті.
«АЯЛА» қайырымдылық қоры 2011 жылдан бері Қарағанды облысындағы медициналық орталықтарға көмек көрсетіп келеді. Осы уақыт ішінде қор 93 миллион теңгеден астам қаражатқа облыстағы үш емдеу мекемесін – облыстық клиникалық аурухананың №1 перинаталдық орталығын, балалар ауруханасын және Теміртау қаласындағы Ана мен бала орталығын реанимациялық-диагностикалық құрал-жабдықтармен қамтамасыз етті.
– Өткен жылдан бастап AYALA қоры Қазақстандағы балалардың мүгедектігін төмендету бойынша белсенді жұмыс жүргізіп келеді. Біздің көз сетчаткасын зерттеу камерамыз Қарағанды облысындағы жаңа туған нәрестелердегі көру қабілетінің бұзылуын нөлге дейін төмендетуге көмектеседі деп үміттенеміз», — деді қордың коммуникациялар жөніндегі вице-президенті Наталья Ескова.
