Келісім онлайн режимінде ата-анаға жіберіледі.
Білім министрлігі мектепке дейінгі мекемелерде кезек күтуді азайту бойынша жүргізіп жатқан жұмыстар және ата-аналарға қолжетімді болатын жаңа мүмкіндіктер туралы ақпарат берді.
Білім вице-министрі Айбат Ілиясовтың айтуынша, таңдалған балабақшада орын босаған кезде ата-ана смс-хабарлама алып, келіскен жағдайда баланың оқуға қабылданғанын растайды.
«Баланың денсаулығы туралы қажетті құжаттар Денсаулық сақтау министрлігінің деректер базасынан автоматты түрде алынады. Келісім қол қою және баланы балабақшаға қабылдау үшін ата-анаға онлайн түрде жіберіледі», — деп қосты Айбат Ілиясов.
Сондай-ақ, кезекке қоюға өтініш берген кезде жәрдемақы автоматты түрде расталып, балабақшаны таңдағаннан кейін ата-анаға хабарлау арқылы кезек нөмірі беріледі. Олардың өмірлік жағдайы өзгерген кезде ата-аналарға балабақшаны ауыстыру, қажет болған жағдайда баланы қарау немесе кезектен шығару мүмкіндігі беріледі.
«Бүгінгі таңда басымдықты есепке алудың бірыңғай негізі әзірленді. Біз мемлекеттік қызметтерді көрсету ережелерінің жобасын дайындадық. Пилоттық жоба Шахтинск және Петропавл қалаларында басталып, қазіргі таңда пилоттық аймақтарда ата-аналармен төрт балабақшаға дейін таңдау және жаңа форматта қызмет көрсету бойынша ақпараттық жұмыстар жүргізілуде. Пилоттық кезең аяқталғаннан кейін жүйе 2024 жылдың қаңтарынан бастап республика бойынша таралады», — деп түйіндеді Ілиясов.
