Бүгін Алматыда Кардиология және ішкі аурулар ғылыми-зерттеу институты, Қазақ ішектерді зерттеу ғылыми қоғамы және С.Асфендияров атындағы ҚазҰМУ ұйымдастыруымен қазақстандық және шетелдік спикерлердің қатысуымен ішектің қабыну аурулары бойынша республикалық мектеп өз жұмысын бастады.
Қазақстанда бірнеше жылдан бері ІҚА-мен сырқаттанушылықтың өсуі байқалады. Ішектің созылмалы патологиялары жасарып, балалар мен жасөспірімдер де сырқатқа шалдығуда. Әрине, бұған ауруды анықтау мен диагностиканың жақсаруы, халықтың заманауи диагностикалық технологияларға қолжетімділігі, мамандардың хабардарлығы мен дайындығын арттыру ықпал етеді. Сонымен қатар, сырқаттанушылықтың өсуі емдеу хаттамаларын жаңартуды, дәрігерлердің сапалы даярлығын және біліктілігін арттыруды талап етеді.
Жиналғандар алдында университет ректоры Марат Шоранов сөз сөйледі: «Кардиология және ішкі аурулар ҒЗИ көптеген жылдар бойы асқазан-ішек жолдарының патологиясы бар пациенттерге көмек көрсету жөніндегі республикалық жетекші орталық болып табылады, оның қызметкерлері диагностикалық әдістерді жетілдіруге тынымсыз еңбек етуде. Ағымдағы жылы ҒЗИ-да МР-энтерография, энтероскопия және ішектің трансабдоминальды УДЗ енгізілді, бұл елдегі ішектің қабыну ауруларын диагностикалау және уақтылы емдеу мүмкіндіктерін едәуір кеңейтті».
«Біздің институт елімізде терапевтік мамандықтарды, оның ішінде гастроэнтерологияны дамыту бағытын тағы да қолға алды. Ғылыми-зерттеу институтының мамандары асқазан-ішек жолдарының патологиясын диагностикалау мен емдеуде жоғары тиімді технологияларды әзірлеу және енгізу бойынша көптеген жұмыстарды атқаруда. ішектің қабыну аурулары. Клиникалық қызметпен қатар, КІАҒЗИ-да тұрақты негізде білім беру және ғылыми іс-шаралар өткізіледі. Біз біліктілікті арттыру циклдарын жаңарттық, резидентураның бес терапевтік мамандығы бойынша аккредиттеуден өттік. Жұмысымыздың маңызды бағыттарының бірі — ғылыми жобаларды іске асыру. Сондай-ақ, халықаралық ынтымақтастық аясында Түркия, Жапония, Ресей, Корея және басқа да елдердегі серіктестерімізбен бұрынғы меморандумдар жаңартылғанын атап өткім келеді. Жоспарымызда — заманауи зертханалық қызметті дамыту, эндоскопия, гепатология, ревматология және басқа да терапевтік бағыттардағы мамандарымыздың сарапшы ретінде тәжірибесін жетілдіру», — дейді Кардиология және ішкі аурулар ҒЗИ Басқарма төрағасы Марат Пашимов.
ІҚА бойынша жетекші маман, м.ғ.к. Жәмиля Қайбуллаева атап өткендей, ауруды тиімді бақылау және асқынуларды азайту үшін ауруды ерте анықтау ғана емес, терапия мен аурудың барысын уақтылы бақылау маңызды. ІҚА бар пациенттердің бірыңғай базасын құру республика бойынша ІҚА ауруы мен таралуы туралы нақты мәліметтер алуға, сондай-ақ өңірлерде ауруды анықтауды жақсартуға мүмкіндік береді.
Ішектің қабыну аурулары жөніндегі республикалық мектеп өңірлердің гастроэнтеролог, колопроктолог, эндоскопист, терапевт, жалпы практика және сәулелік диагностика дәрігерлері үшін тәжірибе алмасу процесінде ІҚА бар пациенттерді бақылауды жақсартуға, халық пен мамандардың ауру туралы ақпараттануын арттыруға мүмкіндік береді. Пленарлық сессиялар барысында ІҚА бар науқастарға көмек көрсету мәселелері, терапияның заманауи трендтері, ІҚА емдеудегі халықаралық тәсілдер мен жергілікті тәжірибе, пациенттерді биологиялық терапияда периоперациялық бақылау, пәнаралық менеджмент мәселелері талқыланды. Сондай-ақ ІҚА тіркелімі, зертханалық диагностика және ІҚА алдын алу мен емдеудегі тамақтану аспектілері туралы айтылды.
