Қазақстанда ерекше балалармен жұмыс істейтін тәрбиешілердің жалақысы қанша екенін Тамара Дүйсенова айтты
Оқу-ағарту министрлігі тәрбиешілердің жалақысын көтеру мәселесін қарастыруда.
Премьер-министрдің орынбасары Тамара Дүйсенова сенатордың сауалына берген жауабында ерекше білім беруді қажет ететін балаларға арналған оңалту орталықтары мен басқа да арнайы ұйымдардағы тәрбиешілердің қандай жалақы алатынын айтты.
Бұған дейін сенатор Талғат Жүнісов өткен жылдың 1 қыркүйегінен бастап жалақысы 30 пайызға көтерілгендердің қатарына арнаулы мектептер, мектеп-интернаттар мен оңалту орталықтарының тәрбиешілер мен қызметкерлері қосылмағанын мәлімдеген болатын.
Оның айтуынша, психологиялық-педагогикалық түзету кабинеттері мен оңалту орталықтарының тәрбиешілері бірқатар қосымша төлемдер алады:
біліктілік санаты үшін – лауазымдық жалақының 30%-дан 50%-ға дейінгі мөлшерінде;
ерекше еңбек жағдайлары үшін – 10 % мөлшерінде;
ерекше білім беру қажеттіліктері бар балалармен жұмыс істегені үшін – негізгі жалақының 40 % мөлшерінде;
ауылдық жерлерде жұмыс істегені үшін – лауазымдық жалақысының 25 пайызы мөлшерінде.
«Бүгінде арнаулы білім беру ұйымдарында 7-10 жыл еңбек өтілі бар және «педагог-модератор» санаты бар тәрбиешілердің жалақысы айына орта есеппен 238 мың теңгені құрайды», — деп хабарлады Премьер-Министрдің орынбасары.
Арнайы білім беру ұйымдарындағы тәрбиешілердің мәртебесін көтеру үшін білім беру қызметкерлерінің жалақысын көтеру мәселесі қарастырылуда. Қажетті қаржылық есептерді Оқу-ағарту министрлігі жасайды. Қосымша қаржылық шығындар Республикалық бюджет комиссиясының қарауына ұсынылады.
«Педагог мәртебесі туралы» Заң әлеуметтік қорғау саласында жұмыс істейтін мұғалімдерге таралуы үшін оған өзгерістер енгізіп, оның қолданылу аясын кеңейту қажет. Бұл да мемлекеттік шығыстардың ұлғаюын білдіреді, деп қосты Тамара Дүйсенова.
