Сұлтан Орынбасаровты еске алуға арналған боччадан ашық республикалық турнир аяқталды, деп хабарлайды елорда әкімдігінің ресми сайты.
Еліміздің 10 облысынан 70-ке жуық спортшы қатысқан жарыс 3 күнге созылып, жасөспірімдер мен ересектер арасында жеңімпаздар анықталды.
Республикалық жарыстардың қорытындысы бойынша Астана қаласы 3 орынды, Павлодар облысы 2 орынды, Жетісу облысы 1 орынды иеленді.
Турнирдің шешуші күні жеңімпаздарды марапаттауға Қазақстан Республикасы Парламенті Сенатының Төрағасы Мәулен Әшімбаев, Қазақстан Республикасы Туризм және спорт вице-министрі Серік Жарасбаев, Астана қаласы әкімінің орынбасары Есет Байкен қатысты.
Мәулен Әшімбаев жарыстың өте қызу өткенін айта келе, елімізде бұл спорт түрінен бәсекелестік артқанын, бочча Паралимпиада ойындарының бағдарламасына енгізілгенін айтты.
Қазақстан бочча федерациясының президенті қатысушыларға және боччаны дамытуға қарқынды үлес қосып жүрген аруларымызға алғысын білдірді.
Ұйымдастырушылардың айтуынша, алдағы уақытта республикалық және аймақтық деңгейде бірнеше жарыстар өткізіледі.
