Алматы облысында азық-түлік жеткізушілері жетім балалардан пайда тапқан
Алматы облысында компания балалар үйіне әлеуметтік маңызы бар азық-түлік өнімдерін 153%-ға дейін үстеме бағамен жеткізді.
Алматы облысындағы өмірлік қиын жағдайға тап болған балаларды қолдау орталығында әлеуметтік маңызы бар азық-түлік тауарларын жоғарылатылған бағамен сатып алу фактілері анықталды. Бүгінде орталықта кәмелетке толмаған 120-дан астам бала тәрбиеленуде.
«Агенттік жеткізуші нанды 140 теңгеге сатып алып, оны балалар үйіне 354 теңгеге (153 пайыз үстемемен) жеткізгенін анықтады. Сондай – ақ оларға: қарақұмық жармасы – 145% (килограмына 281 теңге орнына, 687 теңге), күнбағыс майы-63% (600 теңге орнына, 977 теңге), түйіршіктелген қант – 38% (350 теңге орнына, 480 теңге )», — Қаржылық мониторинг агенттігінің баспасөз қызметі нақтылайды.
Қолданыстағы заңнамаға сәйкес әлеуметтік маңызы бар азық-түлік тауарларына ең жоғары сауда үстемесінің мөлшері 15%-дан аспауы тиіс.
Қабылданған шаралардың нәтижесінде өнім беруші әкімшілік жауапкершілікке тартылып, орталықпен жасалған жеткізу шарты 1,3 млн теңгеге төмендеу жағына қарай қайта қаралды.
Сондай-ақ, агенттік қабылдаған шаралар шеңберінде өңірдің бірқатар балабақшалары жеткізушілермен сатып алу бағасын 3,9 млн теңгеге төмендете отырып, қосымша келісімдер жасасты.
