Алматы қаласының әлеуметтік жағынан осал тобынан кезекте тұрған 164 адамға жалға берілетін пәтер кілті табыс етілді.
Қуанышты жаңа тұрғындарды қалалық инфрақұрылымды дамыту басқармасы басшысының орынбасары Ғалымжан Әбдішүкірұлы құттықтап, жалға берілетін пәтерлер қалалық коммуналдық тұрғын үй қорынан бөлінгенін айтты.
— Бөлімге енгізілген кезекте тұрған 164 адам халықтың әлеуметтік осал топтары санатына жатады. Бұл жетім балалар, I және II топтағы мүгедектігі бар жандар, мүгедектігі бар балаларды тәрбиелеп отырған отбасылар, зейнеткерлер, толық емес отбасылар. Пәтер иелері пәтер жалдау ақысын ай сайын төлейтін болады. Бір бөлмелі пәтерді жалдау құны шамамен 10 мың теңге, екі бөлмелі пәтер шамамен 15 000 теңге болады. Сондай-ақ ай сайынғы коммуналдық төлемдерді төлеу керек. «Бағдарлама шарттарына сәйкес, азаматтарға пәтерді жалға беруге немесе оны жөндеуге тыйым салынады», — деді ол.
Пәтер кілтін алған алматылық Дариға Махажанова қуанышын жасырмады – екі баласы бар келіншек 10 шаршы метрлік жатақхана бөлмесінде әпкесімен бірге ұзақ уақыт тұрып келген.
— Менің екі балам бар. Қызым Аружанның мүгедектігі бар. 2012 жылы халыққа қызмет көрсету орталығына барып, кезекке тұрдым. Мен әпкем және балаларыммен бір бөлмеде тұрамын. Бөлме біз үшін өте тар, сыйыспай бір-бірімізбен түсініспеушілік жиі туындайтын еді. Пәтер кілттерін тапсырып жатқанын естігенде, мен көпке дейін сене алмадым, жыладым. Бізге екі бөлмелі пәтер берді», — дейді Дариға Махажанова.
Әлия Бежанова он жылдан астам баспана кезегінде тұрып, пәтер кілтін алғандардың қатарында болды.
«Менің екі балам бар баспана кезегіне бұрыннан тұрғанмын. Бүгінгі таңда қала сыртында 120 мың теңгеге пәтер жалдап тұрамыз. Олар бізге қоңырау шалып, пәтер туралы айтқанда, біз сенбедік. Басында бір алаяқтардың ісі екен деп ойлаған едік. Көптен күткен пәтер үшін Алматы әкімдігіне мың алғыс! «Мен әлі де қуаныштан жылап жатырмын», — деп әйел қуанышымен бөлісті.
Жуырда халықтың әлеуметтік осал топтарынан кезекте тұрған 124 адам пәтер кілтіне ие болды. Биылғы жылы халықтың әлеуметтік осал топтары үшін екі мың жалдамалы пәтер беру жоспарлануда, оның 400-і жетім балаларға арналған.
