2024 жылы әлеуметтік қызметтер порталы арқылы мүгедектігі бар азаматтар 259 мыңнан астам қызмет алды
2024 жылдың басынан бері Әлеуметтік қызметтер порталы (бұдан әрі – Портал) арқылы мүгедектігі бар азаматтар 202,4 мыңға жуық техникалық оңалту құралдарын (бұдан әрі – ТОҚ), 8 мың – ымдау тілі қызметін, 25,3 мың – жеке көмекшілер, 23,3 мың – санаториялық-курорттық емдеу қызметтерін пайдаланған.
Портал мүгедектігі бар азаматтарға техникалық жабдықтар мен оңалту қызметтерін өндіруші мен жеткізушіні өз бетінше таңдауға мүмкіндік береді. Көмек көрсету түріне тапсырыс беру көрсетілетін қызметті алушының электрондық цифрлық қолтаңбасын растау арқылы жүзеге асырылады. Тапсырыс берілген ТОҚ-ты жеткізу немесе алып кету арқылы алуға болады.
Мүгедектігі бар азаматтарды оңалту құралдарымен қамтамасыз ету протездік-ортопедиялық, есту аппараттарымен, тифлотехникалық және гигиеналық құралдармен, сондай-ақ арнайы арбаларымен қамтамасыз етуді қамтиды.
Бүгінгі таңда Порталда 900 арнаулы әлеуметтік қызметтер көрсету орталығы (бөлімшелері), 749 ТОҚ провайдері, 30 мыңнан астам жеке көмекші қызметтерін көрсетушілер, 744 ымдау тілі және 121 санаторий-курорттық емдеушілер тіркелген.
«Әлеуметтік қызметтер порталы» автоматтандырылған ақпараттық жүйесін енгізу Мүгедектігі бар азаматтардың құқықтарын қамтамасыз ету және өмір сүру сапасын арттыру жөніндегі ұлттық жоспарды іске асыру шеңберінде қарастырылған.
Бұрын хабарланғандай, Қазақстан Республикасының Әлеуметтік кодексін іске асыру шеңберінде жергілікті атқарушы органдардың жанынан құрылған Порталдағы комиссияларға жаңа өкілеттіктер: мүгедектігі бар жандар туралы өтініштерді қабылдау және 5 күн ішінде қарастыру, сапасыз өнім немесе қызмет; жеткізушіге өтінім жіберу және оның орындалуын бақылау; жеткізушіні Порталдан шығару және оны жосықсыз жеткізушілер тізіміне енгізу туралы шешім қабылдау қызметтері берілген.
Порталды пайдалану бойынша кеңесті 1414 бірыңғай нөмірі арқылы қолдау көрсету орталығынан алуға болады.
