Қытайда нашар көретін адамдарға гид-роботтар көмектеседі
Қытайлық әзірлеушілер еріп жүретін гид-робот жасап шығарды. Құрылғы көзі нашар көретін адамдардың өмірін жеңілдетеді. Ал еуропалық өрт сөндірушілер өртті сөндіру үшін жасанды интеллект қолдануда. Технология табиғи апат сценарийін модельдеуге және өртті сөндірудің ең оңтайлы жоспарын көрсетуге көмектеседі.
Ли Фэй мен Чжу Сибин Шанхайдан келген ерлі-зайыптылар. Жастардың көру қабілеті нашар. Қазір олар Шанхай Цзяо Тонг университетінің ғалымдары жасаған бірегей гид-роботты сынауға көмектесуде. Жасанды интеллект негізінде жасалған құрылғы ультра сезімтал қозғалыс сенсорларымен, бейнекамералармен жабдықталған және бағдаршам сигналдарын тануға қабілетті. Робот адам сөзін де түсінеді, командаларды орындайды және қалаған бағытты жоспарлайды.
Гао Фэн, Шанхай Цзяо Тонг университетінің зерттеу тобының жетекшісі:
— Бүгінгі таңда Қытайда көру қабілеті нашар 20 миллион адамға 400-ден астам еріп жүретін ит бар. Бұл иттердің тапшылығына байланысты көптеген адамдар серуендеуге немесе дүкенге бару үшін үйінде отырып, жақындарының қайтып келуін күтуге мәжбүр. Біздің роботтар оларға тәуелсіз және қауіпсіз қозғалуға көмектеседі.
Жасанды интеллект Еуропа елдеріндегі орман өрттерін сөндіруге көмектесуде. Испания мен Португалия арасындағы шекаралық ынтымақтастық аясында елдердің құтқару қызметтері өрттердің алдын алу және сөндіру технологиясын әзірлеуде.
Тереза Момпин, Кастилья-Леон аймағының орман және өрт сөндіру бөлімінің бастығы:
— Бұл жоба орман өрттерімен күресте технологиялық жетістіктерді алға жылжытатынымен маңызды. Жасанды интеллект өрттердің алдын алуға және сөндіруге көмектеседі. Ол жағдайды болжау мен талдауды жақсартады, сондай-ақ тәуекелдерді есептейді.
ЖИ ТҰҚЫМ ҚУАЛАЙТЫН АУРУЛАРДЫҢ ГЕНДЕРІН ТҮЗЕТЕДІ
Калифорниялық компания жасанды интеллектке негізделген бірегей технология жасады. Ол орақ тәрізді жасушалық анемия және соқырлық сияқты тұқым қуалайтын ауруларды тудыратын гендерді өңдей алады. Бұл жаңалық генетикалық ауруларды емдеудің жаңа әдістерін әзірлеуді тездететін жаңалық деп аталды.
АМЕРИКАЛЫҚ ҒАЛЫМДАР АУАДАН СУ АЛУДЫҢ ЖАҢА ӘДІСІН ТАПТЫ
Массачусетс технологиялық институтының ғалымдары ауадан ауыз су алатын құрылғы ойлап тапты. Технология ылғалды тартатын арнайы затпен қапталған көптеген мыс пластиналарынан тұрады. Бұл пластиналар жеткілікті сұйықтық жинаған кезде, олар су алу үшін қыздырылады. Технология негізінен құрғақ климаты бар аймақтарда қолданылады деп күтілуде.
