Мемлекеттік білім беру грантын тағайындау конкурсына қатысу үшін құжаттарды 2024 жылғы 13 шілде мен 24 шілде аралығында тапсыра аласыз.
ҚР Ғылым және жоғары білім министрлігінің ресми Telegram-каналында хабарланғандай, білім гранттары конкурсына қатысуға өтініштерді қабылдау 13 шілдеде басталады.
Конкурсқа қатысуға өтінімдер жоғары және жоғары оқу орнынан кейінгі білім беру ұйымдарының қабылдау комиссиялары арқылы, сондай-ақ «электрондық үкімет» порталы арқылы онлайн түрде беріледі.
2024-2025 оқу жылына жоғары білімнің білім беру бағдарламалары бойынша оқытуға барлығы 78 219 грант бөлінді, оның ішінде 3 903 грант Қазақстан Республикасының Үкіметі белгілеген өңірлерге көшетін ауыл жастары арасынан азаматтарды даярлауға бөлінді.
Шалғай өңірлерден келген талапкерлерге ыңғайлы болу үшін жоғары және жоғары оқу орнынан кейінгі оқу орындарында бейнеконференция арқылы кеңес беретін және конкурсқа құжат тапсыруға көмектесетін виртуалды қабылдау комиссиялары жұмыс істейді, деп хабарлайды басылым.
Білім беру грантын тағайындау конкурсына қатысу үшін ең төменгі баллдар, сондай-ақ ЖОО виртуалды қабылдау комиссияларының тізімі Ұлттық тестілеу орталығының сайтында жарияланған.
Электрондық үкімет порталында құжаттарды тапсыру кезінде пайдаланушылардың бір мезгілде ағынына байланысты техникалық ақаулар байқалуы мүмкін.
Жыл басында біз 2024 жылы қазақстандықтар үшін грантқа қалай түсуге болатыны туралы толықтай шолу жазған болатынбыз: өту ұпайларын, ережелерді және құжаттарды қарастырдық.
Естеріңізге сала кетейік, 2023-2024 оқу жылына 88 мың білім гранты бөлінді. ОКҚ брифингінде ҚР Ғылым және жоғары білім министрі Саясат Нұрбек 2025 жылға дейін гранттар саны жыл сайын 10%-ға артатынын, ал қазақстандықтардың жоғары білім алуға қолжетімділігі едәуір кеңейтілетінін айтты.
