Астаналық сегіз жасар Аиша мен Өскеменнен келген Ева есту қабілеті бұзылған балаларды оңалтуға арналған қосымшаның прототипін жасап шығарды. Олар өз жобаларын Калифорнияда өтетін Technovation Girls атты қыздарға арналған халықаралық технология байқауының финалында ұсынады.
Technovation Girls бағдарламасы ақпараттық технологияларды меңгеруге, жобаларды басқару мен IT-кәсіпкерлік дағдыларын меңгеруге мүдделі 8-18 жас аралығындағы қыздарға арналған. Оның басты мақсаты – қыздардың ІТ әлеміне деген қызығушылығын ояту және технология әлемді жақсы жаққа өзгертудің тиімді құралы бола алатынын көрсету.
«Егер сіз IT саласында дамығыңыз келсе, бірдей қызығушылықтары бар ортаны табу маңызды, өйткені қоғамдастық және сізбен ортақ мүдделері бар басқа адамдармен қарым-қатынас жасау өте маңызды», — дейді Мила Баду, бағдарламаның тәлімгері және Яндекс таксидегі аға тестілеу инженері.
Аиша Есет пен Ева Журкинаның командасы кохлеарлық имплантация операциясынан өткен есту қабілеті жартылай жоғалған балаларға арналған IHear қосымшасының прототипін жасады. Қолданба сөйлеу және сөйлесу дағдыларын дамытуға көмектеседі. Жаттығу үшін қолданба бірнеше құралдарды ұсынады, мысалы, сөйлеу гимнастикасы, дыбыс тренажеры және әртүрлі сынақтар. Қолданбадағы телефон камерасы арқылы объектілерді тану үшін қыздар нейрондық желіні өз бетінше жаттықтырды. Жоба бастауыш сынып оқушыларына арналған Beginners бөліміндегі байқауға қатысты. Қыздар құрбысына көмектескісі келетіндіктен есту қабілеті бұзылған балаларға көмектесетін қосымшаның идеясын ойлап тапты. «Біздің Айлин деген құрбымыз бар, ол біздің бұл жобаны таңдаудың себебі болды. Өкінішке орай, оның туылғаннан бері есту қабілеті жоқ және импланттарды орнату үшін ота жасады. Біз оған көмектесуді шештік», – дейді Айша.
Биылғы жылы Қазақстан дүниежүзі бойынша берілген өтінімдер саны бойынша ТОП-3 елдердің қатарына енді: 2 345 қыз өтініш берді, бұл Қазақстан үшін рекордтық көрсеткіш. 12 апталық бағдарлама бағдарламалау, іскерлік дағдылар, маркетинг және презентация дағдылары бойынша білім беру модульдерін қамтыды. Қатысушылар сонымен қатар Yandex Qazaqstan мамандарынан, ғылыми қауымдастықтан және әлеуметтік кәсіпкерлерден дәрістер алды. Бағдарламаға қатысу тегін.
Бағдарлама жұмыс істеген 8 жыл ішінде Қазақстаннан келген командалар финалға 6 рет шықты. 2017 жылы Қазақстан командасы 63 елдің арасында Гран-приді жеңіп алды.
