Ақмола облысында мүгедектігі бар жандар мен көпбалалы аналардан МӘМС жарнасы заңсыз ұсталды
Ақмола облысының прокуратурасымен міндетті әлеуметтік медициналық сақтандыру (бұдан әрі – МӘМС) саласындағы заңдылық жағдайына талдау жүргізілді.
Жұмыс берушілер төлемнен босатылған көпбалалы аналардан (6-дан астам бала тәрбиелеп отырған), мүгедектігі бар жандардан және күндізгі бөлімде оқитын студенттерден МӘМС жарнасын негізсіз ұстағандығы анықталды.
«Мәселен, көпбалалы ананы жұмыс беруші әлеуметтік медициналық сақтандыру қорына (бұдан әрі – қор) 31 243 теңге аударды. Тағы бір жағдайда мүгедектен қорға 82 306 теңге жарна ұсталған», — делінген хабарламада.
Мұндай фактілер бір емес.
Қадағалау актісі бойынша жеңілдетілген санаттағы 436 тұлғаға жалпы сомасы 60 млн теңгеден астам қаражат қайтарылды.
