Жетісуда дәрігерлердің әрекетінен 18 онкологиялық науқас мүгедектік алу мүмкіндігінен айырылды
Жетісу облысында дәрігерлердің әрекетінен 18 онкологиялық науқас мүгедектік алу мүмкіндігінен айырылды, деп хабарлайды облыстық прокуратураның баспасөз қызметі.
«Прокурорлар 2024 жылы медициналық ұйымдар III-IV топтағы онкологиялық аурумен есепте тұрған облыстың 18 тұрғынын медициналық-әлеуметтік сараптамаға жібермегенін анықтады. Анықтама үшін: медициналық-әлеуметтік сараптама – бұл тексерілетін адамның клиникалық, функционалдық, әлеуметтік, кәсіби және психологиялық деректерін талдау негізінде организмнің жағдайын кешенді бағалау. Осылайша, олар мүгедектік бойынша тіркеуге тұру және кепілдендірілген әлеуметтік жәрдемақы алу мүмкіндігінен айырылды», — делінген сейсенбідегі хабарламада.
Прокурорлық қадағалау актісі бойынша бұзушылықтар жойылды, барлық адамдар медициналық-әлеуметтік сараптамаға жіберілді, олардың екеуі әлеуметтік төлемдер тағайындаумен мүгедектік мәртебесін алды, ал қалған жандарға олардың денсаулығын бағалау бойынша жұмыстар жүргізілуде.
«Азаматтардың әлеуметтік қамсыздандыру құқығын бұзғаны үшін үш медицина қызметкері жауапкершілікке тартылды», — деп толықтырды қадағалау органы.
