«Астана Innovations«АҚ цифрлық сервистерді ұйымдастыру департаментінің директоры Айдын Еспек Коммуникациялар қызметінде өткен брифингте елорда тұрғындары мен қонақтарының өмір сүру сапасын жақсарту мақсатында құрылған «Smart Astana» жаңартылған қосымшасы туралы айтты, деп хабарлайды Астана әкімдігінің ресми сайты.
«Қаламыз қарқынды дамып келеді және күн сайын цифрландыру өмірдің жаңа салаларын қамтиды. «Smart Astana» пайдаланушыларға мүмкіндіктерді кеңінен ұсына отырып, осы үрдістің көрінісі саналады. 2024 жылдың 1 қаңтарынан бастап белсенді қолданушылар саны 28000-нан асты. Бұл халық арасында Цифрлық сервистердің жоғары қызығушылығы мен сұранысын көрсетеді. Қосымша көлік, денсаулық сақтау, білім беру, мәдениет, коммуналдық қызметтер және т.б. қоса алғанда, қала өмірінің әртүрлі салаларын қамтитын 70-тен астам сервистерге қол жеткізуге мүмкіндік береді», – деді Айдын Еспек.
Оның айтуынша, қосымшада жаңалықтар бөлімі, жақын маңдағы велостанциялар туралы ақпарат, медициналық қызметтерге қол жеткізу қызметтері, референдумда дауыс беру алаңын іздеу бар.
«Қарапайым және интуитивті функцияның көмегімен сіздің жеке деректеріңізді (ЖСН) енгізу жеткілікті және қосымша сайлау учаскеңіз туралы қажетті ақпаратты бірден береді. Бұл маңызды қоғамдық-саяси іс-шараларға қатысу процесін едәуір жеңілдетеді және азаматтық белсенділікті арттыруға ықпал етеді», – деді департамент басшысы.
Сонымен қатар, қолданбада пайдаланушыларға негізгі оқиғалар мен жаңартулар туралы уақтылы хабарлауды қамтамасыз ететін push хабарландырулары бар:
— Төтенше жағдайлар: қолайсыз ауа райы жағдайлары, авариялар, коммуналдық қызметтердің жоспарлы ажыратылуы туралы хабарламалар;
— Қалалық іс-шаралар: алдағы концерттер, көрмелер, спорттық іс-шаралар туралы еске салу;
— Қоғамдық-саяси оқиғалар: референдумдар, сайлау, қоғамдық тыңдаулар өткізілетін күн мен уақыты туралы ақпарат;
— Жеке хабарламалар: дәрігерге жазылу туралы ескертулер, берілген өтініштердің статусы, сіз пайдаланған басқа қызметтер.
Оның ішінде қосымшада сыбайлас жемқорлыққа қарсы күрес бөлімі бар – «Сыбайлас жемқорлықты тоқтату». Осы сервис арқылы сыбайлас жемқорлық фактісі туралы өтініш жіберуге және ресми өтініш беруге болады. Жағдайды егжей-тегжейлі сипаттайтын, сыбайлас жемқорлық фактісі болған орынды, уақытты және жағдайларды көрсететін арнайы нысанды толтыра аласыз. Қажет болса, растайтын құжаттарды немесе фотосуреттерді қоса аласыз. Сіздің өтінішіңіз қарау және шаралар қабылдау үшін тиісті органдарға жіберіледі.
Ата-аналар үшін қосымша балабақшаға кезек нөмірін білуге, қаланың мектептері мен университеттері, олардың мекенжайлары мен байланыс деректері туралы ақпарат алуға мүмкіндік береді.
Сонымен қатар, «Smart Astana» елорда қонақтарына да қолайды. Қосымшада теміржол вокзалы мен әуежайдың кестесі, оқиғалардың өзекті афишасы, сауда орталықтарының тізімі бар.
Қосымша арқылы су мен электр есептегіштерінің көрсеткіштерін жіберуге, пломбалауға өтінімдер беру, көмірге тапсырыс беру қызметтері қарастырылған. Сондай-ақ, қазақ әдебиетінің электрондық нұсқалары, оқыту материалдары, онлайн курстар және тілді үйрену мен практикаға арналған басқа да ресурстар қолжетімді.
«Азаматтардың қауіпсіздігін қамтамасыз ету үшін қосымшада шұғыл қызметтердің жылдам байланыстары, төтенше жағдайлар, жол жұмыстары, жоспарлы ажыратулар және т.б. туралы жедел хабарламалар алу мүмкіндігі көзделген. Сондай-ақ, қалалық қызметтермен өзара байланыс функциясы іске асырылды», – деп толықтырды Айдын Еспек.
«Smart Astana» App Store және Google Play Market арқылы тегін жүктеу үшін қолжетімді. Орнатқаннан кейін телефон нөміріңізді көрсетіп, шағын тіркеуден өту керек.
