2023 жылы Қазақстандағы 62 мың жетім баланың 809-ы ғана баспаналы болды, деп хабарлады Сенат депутаты Геннадий Шиповских.
«Түрлі мемлекеттік бағдарламаларда жетім және ата-анасының қамқорлығынсыз қалған балаларға баспана алу үшін жеңілдіктер қарастырылған. Алайда, 2022 жылы жас шегіне жеткен 61 471 баланың 852-сі ғана баспанамен қамтамасыз етілсе, 2023 жылы кезекте тұрған 62 290 баланың 809-ы ғана баспаналы болды», — деді Шиповских бейсенбіде ҚР Парламентінің жоғарғы палатасының отырысында депутаттық сауал жолдаған сөзінде.
Оның айтуынша, тағы бір мәселе-мектепті бітіргеннен кейін олар тәрбиешілермен қоштасады және бұдан әрі не істеу керектігін білмейді. Жетім балалардың колледждер мен жоғары оқу орындарына түсуі үшін бөлінетін гранттар квотасын ұлғайту маңызды.
Дегенмен, шешуші мәселе – мұндай балаларды жұмыспен қамту. Бұл мәселе бойынша статистика көңіл көншітпейді. 2024 жылы ҚР Еңбек және халықты әлеуметтік қорғау министрлігінің мәліметі бойынша квота аясында небәрі 4225 адам жұмысқа орналастырылды, оның 85-і ғана жетім балалар. Сондай-ақ, жастарды жұмыспен қамту шараларымен 188 663 адам қамтылса, оның 1066-сы ғана жетім балалар.
