2024 жылғы 1 қарашадағы жағдай бойынша атаулы әлеуметтік көмек (АӘК) 76 мың отбасындағы 403 мың адамға тағайындалды. Биыл бұл мақсаттарға бюджеттен 54,7 млрд теңге бөлінді.
Бұрын хабарланғандай, АӘК-тің негізгі мақсаты ақшалай төлемдер түрінде қолдау көрсету және отбасының еңбекке қабілетті мүшелерін жұмыспен қамтуға жәрдемдесудің белсенді шараларын тарту арқылы отбасын қиын өмірлік жағдайдан шығару болып табылады.
АӘК келесілерді қамтамасыз етеді:
— табысы облыстық ең төменгі күнкөріс деңгейінің 70 пайызынан аспайтын азаматтарға тоқсан сайынғы әлеуметтік көмек тағайындау;
— 1 жастан 6 жасқа дейінгі аз қамтылған отбасы балаларына ай сайынғы қосымша ақы төлеу. Әр балаға 1,5 АЕК (5 538 теңге). Ағымдағы жылдың 1 қарашасындағы жағдай бойынша АӘК алушылардың арасынан 126 мың мектеп жасына дейінгі балаға 4,5 млрд теңге сомасында қосымша төлем тағайындалды;
— жұмысқа орналастыру арқылы жұмысқа орналасуға жәрдемдесу, өз ісін ашуға ынталы отбасыларға гранттар беру, біліктілікті арттыру курстарына жолдама беру (қажет болған жағдайда) және т.б.
Қазіргі таңда қазақстандықтар АӘК тағайындау үшін мансап орталығына, тұрғылықты жері бойынша ауылдық округ әкіміне немесе электронды үкімет порталы (egov.kz) арқылы өтініш бере алады.
