Премьер-Министр Олжас Бектенов Мемлекет басшысының халықты әлеуметтік қолдау жүйесін жетілдіруге қатысты тапсырмаларын орындау мәселелері бойынша кеңес өткізді.
Еңбек және халықты әлеуметтік қорғау министрі Светлана Жақыпова цифрлық шешімдерге негізделген жаңа тәсілдермен таныстырды, бұл қолдау шараларының қайталануын болдырмайды және «әлеуметтік әділеттілік» қағидасына сәйкес әлеуметтік төлемдерді бөлудің тиімділігін арттырады.
Ағымдағы жылдың наурыз айындағы жағдай бойынша Қазақстанда 4 миллионнан астам азамат түрлі әлеуметтік қолдау шараларымен қамтылған, оның ішінде атаулы көмек, көпбалалы отбасыларға төленетін төлемдер, мүгедектік бойынша жәрдемақылар, босанғанға дейінгі және босанғаннан кейінгі төлемдер, халықтың аз қамтылған топтарын қолдау және т.б. Бұл ретте «Цифрлық отбасы картасы» деректерін талдау қиын өмірлік жағдайдағы санатқа тек 564 мың азаматтың жататынын көрсетеді. Осыған байланысты әлеуметтік көмек көрсетудің категориялық принципінен нақты қажеттілік критерийлеріне көшуге бағытталған механизм қарастырылуда.
Сондай-ақ мұқтаж азаматтарды қамтудағы аймақтық теңсіздік проблемасын шешу мәселесіне де назар аударылды. Атап айтқанда, облыстар мен қалаларға қарамастан төлемдердің түрлері мен мөлшерін бір жүйеге келтіру туралы ойлар айтылды.
Олжас Бектенов Үкімет жұмысының басымдығы мұқтаж азаматтарды одан әрі қанағаттанарлық өмір сүру деңгейі бар санаттарға көшіру үшін қолдау шараларымен қамту екенін атап өтті. Еңбек және халықты әлеуметтік қорғау және цифрлық даму министрліктеріне жақын арада мұқтаждық деңгейін бағалау үшін әл-ауқаттың толықтай талдауы бойынша жұмысты аяқтау тапсырылды. Мұқтаждар жүйесінде көрініс таппаған азаматтарға жеке жұмыс жүргізу тапсырылды.
