Мүмкіндігі шектеулі жандардың жұмыс табу мүмкіндігі жоғары. Мемлекет жұмыс берушілерге мүмкіндігі шектеулі қызметкерлер үшін қолжетімді орта құруға көмектеседі. Кәсіпкерлер Қарағанды облысының әр қалаларында арнайы жұмыс орындарын ашуда.
Светлана Рябцева екі айдан бері тігін цехында жұмыс істейді. Ол бұрын үйде тігетін, қазір ұжымда жұмыс істейді. Есту қабілеті нашар қызметкерге ыңғайлы болу үшін ғимаратта оның жүруіне көмектесетін жарық шамдары орнатылған.
Светлана Рябцева, тігінші:
— Маған осында жұмыс істеген ұнайды. Құрметтейді, ұжым өте жақсы. Олар маған түсіністікпен қарайды. Мен нашар естимін, маған түсіндіруге тырысады.
Бұл цех полиция мен жедел жәрдем қызметкерлеріне арнайы киімдер мен жұмыс киімдерін шығарады. Тігіншілер әрдайым жетіспейді, сондықтан компания барлық әлеуметтік жобаларға белсенді қатысады.
Қаламқас Сауханова, тігін өндірісінің басшысы:
– Біз кеңейіп жатырмыз, бұдан да көп адамды алғымыз келеді. Қазір әлеуметтік жұмыс орнына 2 адам, «Күміс ғасыр» бойынша 3 адам есепте тұр. Жұмыс істеп ақша тапқыңыз келсе неге болмайды. Бізде барлық жағдай жасалған.
Мүмкіндігі шектеулі жандарды жұмыспен қамтып отырған кәсіпкерлер субсидия алады. Арнайы қызметкерлерге құрал-жабдық сатып алуға және орнатуға және оларға жалақы төлеуге кеткен шығындарын мемлекет өтейді.
Рүстем Манапов, Шахтинск мансап орталығының басшысы:
— Біз сатып алатын жабдықтардың тізімі бар. Бірақ бұл осы санатқа арналған жабдық болуы керек. Егер есту қабілеті нашар болса, онда сигнал беретін жабдық болуы керек. Биыл бір жұмыс орнына 1 миллионнан астам қаржы бөлінді.
Қарағанды облысының кәсіпкерлері Еңбек ұтқырлығы орталығына ерекше қажеттіліктері бар адамдар үшін арнайы жұмыс орындарын құруға 10-нан астам өтінім берді.
