Қазақстандықтардың жеке куәліктері Samsung Wallet жүйесінде қолжетімді болады.
Қазақстандықтар енді Egov Mobile-дан жеке куәлігінің цифрлық нұсқасын Samsung Wallet электрондық әмиянына орналастыруға мүмкіндік алды. Жобаны Цифрлық даму, инновациялар және аэроғарыш өнеркәсібі министрлігі, «Ұлттық ақпараттық технологиялар» АҚ Samsung Electronics Central Eurasia компаниясымен бірлесіп пилоттық тәртіпте іске қосты.
Samsung Wallet жүйесіндегі цифрлық идентификатор — жеке ақпаратты сақтаудың ыңғайлы және қауіпсіз жолы. Азаматтар физикалық ақпарат құралдарын жоғалтудан немесе ұрлаудан қорықпай, өз құжаттарын сандық форматта бірден ұсына алады. Барлық деректер жеке ақпаратты сенімді қорғауды қамтамасыз ететін көп деңгейлі қауіпсіздік жүйесімен қорғалған.
Функция Egov Mobile қолданбасы орнатылған Samsung смартфонының пайдаланушылары үшін қолжетімді.
Құжаттарды қосу үшін пайдаланушыға келесілерді орындау қажет:
— Egov Mobile қосымшасына кіріп, «Цифрлық құжаттар» қызметіне өтіңіз,
— «Жеке куәлік» цифрлық құжатын ашып, «Samsung Wallet-ке қосу» түймесін басыңыз,
— жеке деректерді өңдеу туралы келісімді оқып шығыңыз, оларды өңдеуге келісім беріңіз және электрондық қолтаңбаны пайдалана отырып, оған «қол қойыңыз».
Цифрлық жеке куәліктің мәліметтер бөлімінде көрсетілген жарамдылық мерзімі азаматтың жеке куәлігінде көрсетілген жарамдылық мерзімімен бірдей болады. Егер идентификатордағы ақпарат уақыт өте өзгерсе, пайдаланушы ағымдағы сандық идентификаторды жоя алады, содан кейін физикалық идентификатор қайта шығарылған кезде оны жаңарту үшін қайта қоса алады.
