«Шекарасыз мәдениет»: мүгедектігі бар жандарға арналған тегін іс-шаралар
Қазақстанда «Шекарасыз мәдениет» акциясы жарияланды.
Қазан айының екінші жексенбісінде Қазақстанда мүгедектігі бар азаматтар күні атап өтіледі.
Ерекше қажеттіліктері бар азаматтарды әлеуметтік қолдау және өмір сүру сапасын арттыру – мемлекеттік саясаттың негізгі бағыттарының бірі.
Қазақстанда мүгедектігі бар азаматтар күні қарсаңында «Шекарасыз мәдениет» акциясы жарияланды.
2024 жылдың 13 қазаны мен 31 желтоқсаны аралығында өтетін акция аясында I, II және III топтағы ерекше қажеттіліктері бар азаматтар мемлекеттік мәдени-сауық мекемелері өткізетін іс-шараларға тегін қатыса алады.
Акцияның мақсаты – мүмкіндігі шектеулі жандар үшін мәдени нысандардың қолжетімділігін арттыру, олардың еліміздің мәдени өміріне араласуын қамтамасыз ету және олардың мәселелеріне қоғамның назарын аудару.
Мамандандырылған мемлекеттік мекемелердің мәдени-ойын-сауық іс-шараларына ерекше қажеттіліктері бар балалар мен бірінші және екінші топтағы мүгедектігі бар ересектер тұрақты негізде тегін қатыса алатынын атап өткен жөн.
Үшінші топқа 50 пайыздық жеңілдік қарастырылған.
