2024 жылдың басынан бастап санаторий-курорттық емдеу қызметтерімен мүгедектігі бар 79,7 мың адам немесе мұқтаж адамдардың 63% қамтылды. Оның ішінде 5 мыңнан астам бала бар.
Санаторлық-курорттық емдеу мүгедектігі бар адамдарға жеке оңалту және оңалту бағдарламасына сәйкес көрсетіледі.
Қазақстан Республикасы Әлеуметтік кодексінің 160-бабына сәйкес мүгедектігі бар адамдар мемлекеттік бюджет қаражаты есебінен санаториялық-курорттық емделумен тегін қамтамасыз етіледі. 2024 жылға санаториялық-курорттық емделуге кеткен шығындарды өтеудің кепілдік берілген сомасы тәулігіне 21 617,78 теңгені (14 күн – 302 648 теңге) құрады.
Бүгінгі таңда Әлеуметтік қызметтер порталында 125 санаторий-курорттық қызмет көрсетуші тіркелген.
Бұрын хабарланғандай, Қазақстан Республикасы Еңбек және халықты әлеуметтік қорғау министрлігі мүгедектігі бар адамдардың мүдделері мен құқықтарын қорғау мақсатында ҚР Еңбек және халықты әлеуметтік қорғау министрлігі жергілікті атқарушы органдар жанындағы әлеуметтік қызметтер порталы мәселелері жөніндегі комиссиялардың қызметін реттейтін және техникалық құралдар мен оңалту қызметтерін жеткізушілерге қойылатын талаптарды күшейтетін Қолданыстағы НҚА-ға өзгерістер енгізу туралы ведомство басшысының бұйрығының жобасын әзірледі.
Құжатта әлеуметтік қызметтер порталында тауарлар мен қызметтерді жеткізушілерді тіркеуге және жіберуге қойылатын талаптар күшейтілді. Санаторий-курорттық емдеу қызметтерін жеткізушілер әлеуметтік қызметтер порталында санаторий-курорттық ұйымдардағы орындардың жалпы саны бойынша, сондай-ақ мүгедектігі бар адамдар мен еріп жүрушілер үшін берілетін орындардың саны туралы ай сайын төсек-орындардың жалпы санының кемінде 10% көлемінде деректерді енгізуге міндетті.
Сонымен қатар, бұйрық жобасында келушілер арқылы жеткізушілердің мониторингі көзделген. Осылайша, әлеуметтік қызметтер порталы арқылы мүгедектігі бар адамдарға көрсетілетін тауарлар мен қызметтердің өнім беруші мәлімдеген сипаттамаларының сәйкестігі тексерілетін болады.
Мониторинг сондай-ақ техникалық көмекші (компенсаторлық) құралдармен, арнаулы жүріп-тұру құралдарымен немесе әлеуметтік қызметтер порталы арқылы көрсетілетін қызметтермен қамтамасыз етілген мүгедектігі бар адамдарға бару арқылы жүзеге асырылатын болады.
Сонымен қатар, жергілікті атқарушы органдар жанындағы Әлеуметтік қызметтер порталындағы комиссиялардың мүгедектігі бар жандардың тауарлар мен қызметтердің сапасына шағымдарын қарау мерзімі 10 жұмыс күнінен 5 жұмыс күніне дейін қысқартылуда.
Жоғарыда аталған талаптар әлеуметтік қызметтер порталында тауарлар мен қызметтерді жеткізуші ретінде барлық қажетті талаптарға сай келетін ұйымдардың ғана қабылдануын қамтамасыз етеді. Бұл көрсетілетін қызметтердің сапасын арттырып, оларды алушылардың қауіпсіздігін қамтамасыз етеді.
