Тәуелсіздік күні қарсаңында Астанада дәстүрлі «Игі істер марафоны» шарасы өтті.
Акцияны «Астана жастары» жастар ресурстық орталығы ұйымдастырды.
Еріктілер жалғыз тұратын ардагерлер мен зейнеткерлерге көмек көрсетіп, қыс күндері жылылық пен қамқорлық атмосферасын қалыптастырды. Акция аясында еріктілер қарттарға азық-түлік себетін жеткізіп, үйлер мен аулаларды тазалауға көмектесті.
«Біз аз қамтылған отбасылар мен жалғызбасты зейнеткерлерге үнемі барып тұрамыз. Бүгін біздің волонтерлар азық-түлік себетін жеткізумен қатар, үйлерді тазарту жұмыстарын жүргізді, гүлдерді суарды, шаңды сүртті. Жігіттер көмір әкелді. Сондай-ақ аулалардағы қарды да жүйелі түрде шығарамыз. Науқанның өтіп жатқанына төрт жылдай болды, біз көмектескен сайын адамдарды қажетті өнімдермен қамтамасыз етіп қана қоймай, олардың үйлеріне жылулық пен қамқорлық әкелеміз. Бүгін акция «Көктал» тұрғын алабында өтті», — дейді «Астана жастары» ЖРО қызметкері Камилла Мұхатаева.
«Мен екі жылдан бері ерікті ретінде іс-шараларға қатысып, қарттарға көмектесіп келемін. Бұл мен үшін маңызды нәрсе, өйткені адамдарға қуаныш сыйлау құнды. Сіздің көмегіңіз басқалардың өмірін қалай жеңілдететінін көру өте жақсы. Біз азық-түлік әкеліп қана қоймай, қарды тазалаймыз, ауланы тазалаймыз, көмірмен көмектесеміз — біз бұл адамдардың қажет екенін сезінуі және ұмытылмауы үшін қолдан келгеннің бәрін жасаймыз. Волонтерлік қызмет маған көмектесу мүмкіндігін ғана емес, маңызды өмірлік сабақтарды да береді», — деп атап өтті «Астана Жастар» волонтеры Милат Әлімбекова.
Зейнеткер Раида Мифтахова көп жыл бұрын Башқұртстаннан көшіп келген Қазақстандағы өмірі туралы айтып берді. Күйеуімен бірге құрылыста жұмыс істеп, үй салған ауыр жылдарды еске алады. Жақындарынан айырылған ол Германияда тұратын қызы және немерелерімен байланысын үзбей, жалғыз өзі өмір сүріп жатыр. Сондай-ақ ол Қазақстанға келгеннен бері осы елдің бір бөлшегіне айналғанын, өз халқын жақсы көретінің, көршілерінің құрметі мен қамқорлығын сезінетінін атап өтті.
«Қолдау көрсететін мейірімді адамдар әрқашан осында болады, еріктілер жиі келіп, азық-түлік әкеледі және үй шаруашылығына көмектеседі. Бұл мен үшін әсіресе маңызды, өйткені мен қартайған сайын кейбір заттарды жасау қиындай түседі. Қолдау көрсеткендердің барлығына алғыс айтамын. Мен сіздерге бейбітшілік пен тыныштық тілеймін, әрқашан да келісім мен қуанышта өмір сүрейік. Жаңа жыл баршаға бақыт пен бақ-береке әкелсін», — деді Раида Мифтахова.
